Xocalı... 1992-ci il fevralın 25-dən 26-na keçən gecə erməni vandallarının qəsəbədə törətdiyi vəhşilikdən sonra bu ad Azərbaycanın qan yaddaşına dönüb. Xocalı faciəsi insanlığa yönələn ən dəhşətli cinayətlərdən biri kimi bəşər tarixinə yazılıb. II qrup Qarabağ müharibəsi əlili - Hüseyn Əzimov 1988-ci ildə böyüyüb boya-başa çatdığı doğma yurdundan - Əsgərandan qaçqın düşür. Erməni silahlıları rus hərbçilərinin köməyilə rayonu işğal etdikdən sonra qəhrəmanım ailəsi ilə birlikdə məhz Xocalıya sığınır. O şaxtalı qanlı fevral gecəsində yaşadıqları isə həyatının ən dəhşətli, ən ağır anları kimi xatirəsində silinməz izlər buraxıb. Dinc əhalinin üstünə yağan güllə yağışı Hüseyn Əzimovun doğmalarından da yan keçmədi. Həmin gecədə ona həyat verən anasını, atasını itirdi. Xocalı həm də erməninin iç üzünün açıldığı yer idi. Vəhşilik, vandallıq, amansızlıq, qəddarlıq talançılıq... Məkrli düşmən xüsusi amansızlıqla qətlə yetirdiyi insanların meyitlərini talamaqdan da qalmadı. Xocalı soyqırımında bir gecədə 613 nəfər azərbaycanlı qətlə yetirildi. Onlardan 63-ü uşaq, 106-sı qadın, 70-i isə yaşlı nəslin nümayəndəsi idi. 8 ailə tamamilə məhv edildi. 25 uşaq hər iki valideynini, 130 uşaq valideynlərindən birini itirdi. Düşmən gülləsinə tuş gəlib yaralanan 487 nəfərdən 76-sı uşaq idi. 1275 xocalı sakini əsir, 150-si itkin düşdü. Ancaq heç bir faciə xalqımızın işğal altında olan torpaqlarını azad etmək istəyini, əzmini qıra bilməyib. Bu gün şəhidlərin qanını almaq üçün Ali Baş Komandanın çağırışını gözləyən döyüş ruhlu əsgərlərimiz, nizamı ordumuz var.
Mənbə: Milli.Az
XƏBƏR LENTİ
- ŞƏRHLƏR