Körpə balam,
sənə lay-lay demirəm,
həmişə ayıq yat.
Ətrafında
dünənini unudub,
sabahını görməyən
yuxuluları da oyat.
İşığım mənim,
Evimin nuru olma təkcə,
hərdən uzaq, boz daxmaların da
lampasını yandır.
Günəş ol, balam,
dünyamızın qaranlıqlarını
işıqlandır.
Ürəyim balam,
bəbələri ağlara, qaralara bölmə,
çörəyini böl onlarla.
bir də ürəyini böl
bir ovuc sevgiyə
möhtac olanlarla.
Bacarsan ümid ver insanlara,
quzum,
sevinc gətir.
Çaşma dərd görəndə,
kədər hamının ünvanını bilir.
Düşmən sipəri oğlum,
torpağı canından çox sev,
kimsəylə paylaşma.
Mübariz ol, amma rəhmsiz olma.
Gül də yığ bəzən
daş yığdığın balaca ovucuna.
Gözümün nuru,
haqqa tapın yalnız,
haqqı qoru.
Haqsızlıq görəndə susma.
Azad ol, oğul,
Allah hər zaman səninlədir,
unutma.
XƏBƏR LENTİ
- ŞƏRHLƏR