Aclıq vücudun verdiyi ən gözəl reaksiyalardan biridir. Əslində acmırsınızsa, bunun mütləq bir səbəbi vardır. Ancaq tez-tez acırsınızsa və dayanmadan yemək yeyirsinizsə buna tezliklə çarə tapmalısınız. Qidalardakı karbohidratlar həzm sisteminə fərqli surətdə keçir və həzm edilir, bu vəziyyət qlikemik indeksə (Qİ) təsir edən ən vacib səbəblərdəndir. Qİ - aşağı olan qidalar, qan şəkərinin daha yavaş yüksəlməsinə səbəb olacağından daima seçim edilməlidir. Bəzi qidalar insanı tox saxlayar, tez acdırmaz, çünki səbəb qan şəkərinin tarazlıqda olmasıdır. Beləliklə, gün ərzində daha az yeyərək daha asan arıqlaya bilərsiniz.
Qİ-i aşağı səviyyədə olan qidalar hansılardır?
Qidamızda tərəvəz, meyvə, paxlalar, qara çörək, kəpəkli makaron kimi qidalara üstünlük verilməlidir. Bu ərzaqlar qan şəkərimizi tarazlıqda saxlayır və bizi acdırmır. Beləliklə, gün boyu yediyimiz yemək miqdarı azalır.
Arıqlamağa kömək edən qidalar hansılardır?
Mərci, paxla, yulaf, tərəvəzlər və bəzi meyvələr çəkinin nisbətən tez itirilməsinə yardım edir. Bunların tərkibindəki lif şəkər molekulları ilə birləşib onların sovrulmasını yavaşladır. Bu qidalar qan şəkərimizi eyni tarazlıqda saxlayır. Onsuz da pəhriz saxlamanın və çəkini qorumağın əsas səbəbi qan şəkərini tarazlıqda saxlamaqdır.
Qan şəkərini yüksəldən qidalar yediyimiz zaman (məsələn, bal, şəkər, banan, qarpız, buğda unu kimi) içindəki şəkər mədə və bağırsaqlarda tez sovrulur və qan şəkərini tez bir zamanda yüksəldir. Yeməyin üstündən şirin bir şey yedikdə daha tez acırıq.
Hansı meyvələrdən nə qədər yeməliyik?
Gündə 3-5 boşqab meyvə-tərəvəz yemək sadəcə arıqlamaq üçün deyil, sağlam həyat tərzi və bir çox xəstəliklərə qarşı qorunmaq üçündür. Arıqlamaq istəyən şəxs hər gün bir alma yeməlidir. Mövsümündə nar da yemək olar.
Soya paxlası: B6 vitamini ilə zəngindir. Xərçəng xəstəliyinə qarşı qoruyucu təsirə malikdir. İçindəki yüksək keyfiyyətli zülal doymaq hissini artırır. Şəkər xəstələrinin istifadə etməsi də məsləhət görülür.
Çovdar çörəyi: Pəhrizlərdə həmişə kəpəkli çörəklərdən istifadə edilsə də, çovdar çörəyi insanı tox saxlayır. Tərkibindəki xrom mineralları iştaha kəsəndir. Bağırsaq hərəkətlərinin azlığından yaranan qəbizliklərdə, şəkər xəstəliklərində, xolesterolu yüksək olan xəstələrin çovdar çörəyindən istifadə etməsi məsləhət görülür.
Böyürtkən, brokoli: Hər ikisi C vitamini ilə zəngin qidadır. Çəkiyə nəzarətdə tox saxlaması baxımından brokolinin qatıq ilə qarışdırılıb yeyilməsi məsləhət görülür.
Badam: Gündə 1-2 ovuc badam toxluq hissini artırır, köklük xəstəliyi ilə mübarizədə mühüm rol oynayır. Ancaq badamın duzsuz olması vacibdir.
Toyuq: Xrom mineralı və protein ilə zəngindir. Yağsız bişmiş toyuq əti sizi uzun zaman tox saxlayar.
Yumurta: Yaxşı bişmiş yumurta da tox saxlayan qidalar arasındadır. Ana südündən sonra "nümunəvi zülal" olaraq qəbul edildiyini unutmayaq.
Tərəvəz şorbası: Şorba aşağı kalorilidir, buna görə də çəkini qorumaq üçün mühüm qida kimi qəbul edilir.
Cökə çayı: Yemək vaxtına yaxın içilən cökə çayı həzmi asanlaşdırır, mədəni rahatlaşdırır və iştahanı kəsir.
XƏBƏR LENTİ
- ŞƏRHLƏR