Əmək və Əhalinin Sosial Müdafiəsi Nazirliyi tərəfindən bu ilin ilk rübündə 372 min 290 nəfərə aylıq və birdəfəlik sosial müavinət ödənilib.
Nazirlikdən ANS PRESS-ə verilən məlumata görə, onlardan 340 min 254 nəfəri (91,4%) aylıq, 32 min 36 nəfəri birdəfəlik (8,6%) sosial müavinət alıb.
Ötən ilin müvafiq dövrü ilə müqayisədə müharibə veteranlarına ödənilən aylıq sosial müavinətlərin məbləği 21,6 faiz artıb. Hazırda 52 min 596 nəfər müharibə veteranı həmin aylıq sosial müavinətlə təmin edilir.
Eyni zamanda, Azərbaycan Respublikası Prezidentinin 27 dekabr 2013-cü il tarixli Fərmanına əsasən, 01 yanvar 2014-cü il tarixdən etibarən beşdən çox uşağı olan qadınların 18 yaşına çatmamış hər bir uşağına görə 30 manat məbləğində aylıq sosial müavinət təyin olunur. Hazırda beşdən çox uşağı olan 3 min 33 nəfər qadının 18 yaşına çatmamış 8 min 766 nəfər uşağına həmin aylıq müavinət ödənilir.
Bu ilin birinci rübündə ötən ilin müvafiq dövrünə nisbətən aylıq və birdəfəlik sosial müavinət və kompensasiyaların ödənilməsinə 2,2 milyon manat, yəni 4 %-dək çox vəsait yönəldilib. Sosial müavinət və təqaüdlərin ödənişində şəffaflığın təmin oluması məqsədilə sosial müavinətlərə, həmçinin təqaüdlərə dair məlumatlar xüsusi proqram təminatı vasitəsilə vahid məlumat bazasında toplanıb. Ölkədə sosial müavinətlərin ödənişi plastik kartlarla bankomatlar vasitəsilə həyata keçirilir və sosial müavinət, həmçinin təqaüd təyin olunanların siyahısı ƏƏSMN-nin rəsmi saytının (www.mlspp.gov.az) “Fəaliyyət və xidmətlər” bölümündə təqdim olunur.
Mənbə: ANS PRESS
XƏBƏR LENTİ
- ŞƏRHLƏR