Dekabrın 26-dan Bakı Dövlət Sirkində “Fəvvarələrin qış nağılı” şousu başlanır.
Sirkin mətbuat xidmətinin rəhbəri Mahir Hümbətov bildirib ki, bu möhtəşəm lazer və sirk şousu üçün Bakı Dövlət Sirkinin səhnəsində xüsusi avadanlıq quraşdırılıb. Proqrama lazer, sirk şousu ilə yanaşı əfsanəvi personajlar, əhliləşdirilmiş heyvanlar, hava gimnastları, Şaxta baba, Qar qız və digər rəngarəng nömrələr də daxildir.
M.Hümbətov deyib: “Dünya sirk səhnələrinin ən maraqlı şouları ilk dəfə olaraq azərbaycanlı tamaşaçılara təqdim olunacaq. Həmçinin müasir texnologiyadan istifadə etməklə interaktiv nömrələr nəzərdə tutulub. Xüsusi süjeti olan bu proqramın davam etmə müddəti təxminən 2 saat 30 dəqiqədir. Yanvarın ortasınadək davam edəcək proqram müddətində gün ərzində 1, 2 və 3 seans təqdim olunacaq”.
“Fəvvarələrin qış nağılı” şousu üçün biletlərin qiyməti 8-15 manat arasındadır. Məktəblilər yeni il ərəfəsində, eləcə də qış tətili günlərində “Fəvvarələrin qış nağılı”na baxa bilərlər.
XƏBƏR LENTİ
- ŞƏRHLƏR