Xocalı faciəsində bütün ailəsini və yaxınlarını itirmiş
Əsli anamıza
Donmuş baxışların od tək yandırır,
Buzun belədirsə, odun nə imiş?
Gözündə donubdur o qış gecəsi
Dağların qarı da saçına enmiş.
Gözlərinə qurban, dəryadan dərin,
Dənizlər də daşar sən ağlayanda.
Bilmirəm, nə haqda düşünür qəlbin
O qarlı gecəni xatırlayanda...
Nə deyim, qismətin niyə belədir,
Deyirlər, talelər göylərdən gəlir.
Nədən başlayım mən, harda susum mən,
Şəkillər yaşayır, baxışlar dəlir.
Hər gözdə min arzu-dilək yaşayır,
Hər baxış ümidlə, fərəhlə gülür.
Faciələr dolu Xocalımızdan
İllərin yaddaşı oyanır, gəlir.
Səsin titrəsə də duruşun məğrur,
Qoy düşmən kəlməni bir də dinləsin.
Qatilə bu dağı diləməmək də
Deyil cəsarəti, bilin, heç kəsin.
Brest 26.02.2011
Nə səbəbdən üzüm gülsün,a dünya!?
Haray çəkir,Laçın bizi səsləyir
Nə səbəbdən üzüm gülsün,a dünya!?
Torpağımda yad nəfəslər əsnəyir.
Nə səbəbdən üzüm gülsün,a dünya!?
Ələsgəri qurban verdik,niyə biz?
Bəd əməli yaxşı bildik,niyə biz!?
Çox dərsləri yaddan sildik,niyə biz!?
Nə səbəbdən üzüm gülsün,a dünya!?
Naxçıvanı ayrı saldıq,barışdıq!
Göyçə getdi,aciz olduq,barşdıq!
Nə dedilər çəpik çaldıq,barışdıq!
Nə səbəbdən üzüm gülsün,a dünya!?
Kəlbəcəri tapdaq etdi yağılar,
Yazılacaq hələ neçə ağılar.
Danışmıram,yoxsa dünyam dağılar.
Nə səbəbdən üzüm gülsün,a dünya!?
Canımızdan canı verdik özgəyə,
Ad qoydular,baxmadılar güzgüyə.
Ağrılarım sığışmayır yerə ,göyə,
Nə səbəbdən üzüm gülsün,a dünya!?
Zəngilansız,Qubadlısız qalmışıq.
Evimizdə "qaçqin" adi almışıq,
Müvəqqəti neçə yuva salmışıq!
Nə səbəbdən üzüm gülsün,a dünya!?
Füzulinin adı qalb,özü yox,
Viran olub,babaların izi yox
Yerə dəyib Qarabağım,dizi yox
Nə səbəbdən üzüm gülsün,a dünya!?
Əsgəransız,Xocalısız,Ağdamsız,
Kişilik yox,düşmən dinsiz,imansız.
Dayaq verib,arxa duran amansız!
Nə səbəbdən üzüm gülsün,a dünya!?
Boylanıram,zirvələri kövrəldir.
Murovumu düşmən didir,əridir!
Tərtərimin suyu yaşdır,qəhərdir,
Nə səbəbdən üzüm gülsün,a dünya!?
Torpağından yoğrulmuşuq,neyləyək.
Neçə kərə ovulmuşuq,neyləyək.
Evimizdən qovulmuşuq,neyləyək.
Nə səbəbdən üzüm gülsün,a dünya!?
Hərdən qalxır günbatandan yağışlar.
Damlaları göz yaşımla qarışar.
Bir ağlasaq Araz dolar,Kür daşar!
Nə səbəbdən üzüm gülsün,a dünya!?
Niyə belə amansızsan,qətisən?
Ədaləti doğramağa itisən.
Düyünlərin açılmayır,çətinsən!
Nə səbəbdən üzüm gülsün,a dünya!?
Şuşa yoxdur,Cəbrayılı vermişik,
Düşmən ilə boş söhbətə girmişik.
Neçə-neçə bəd üzünü görmüşük.
Nə səbəbdən üzüm gülsün,a dünya!?
İlham İdrisoğlu 22.05.2010 Brest
XƏBƏR LENTİ
- ŞƏRHLƏR