Amerikalı idmançı Ceyms Klir səhəri faydalı və xoş etməyin yollarını bilir. O, səkkiz məsləhətlə buna nail olmağın mümkün olduğunu deyir, əsas odur ki, vərdiş halını alsın.
Milli.Az delo.ua-ya istinadən bildirir ki, ÜST-ün məlumatına görə, yaşlı adam ömrü ərzində 25 min dəfə səhəri qarşılayır. Yaxşı iddiadır, kaş hamı 68 yaş və ondan da çox yaşaya ki, bu qədər səhər görə. Bu səhərləri xeyirli etmək isə öz əlimizdədir - bunu da Ceyms Klir deyir.
1. Vaxtı deyil, öz enerjinizi idarə edin.
Əlbət, özünüz hansı işi günün hansı vaxtında daha yaxşı gördüyünüzü bilirsiniz. Məsələn, əgər yaradıcı enerjiniz səhər açılan kimi oyanırsa, o zaman bu vaxt rutin işlərlə məşğul olmayın, sadəcə yaratmaq istədiyinizi yaradın. Telefon zənglərini, məktubları-filan - hamısını günün ikinci yarısına keçirin.
2. Səhərə axşamdan hazırlaşın.
Elə də asan olmasa da, sabahı gününüzün planlaşdırılmasına axşamdan 10-12 dəqiqə sərf etməyinizdə fayda var. Axşam səhərinizin necə olacağını təsəvvür etməyə çalışın. O zaman səhər işə başlamaq daha asan olacaq.
3. Günortayadək məktub oxumayın.
E-mail qutusunu açmaq arzusunu dəf etmək çox çətindir - çoxları bunu oyanan kimi, gözlərini ovuşdura-ovuşdura, əl-üzlərini yumadan edirlər. Axı gözləyə də bilər! Enerjinizi poçtun təmizlənməsinə niyə sərf edirsiniz? Səhəri "təcili" bir işi görməyə deyil, vacib bir işi görməyə həsr edin.
4. Telefonu söndürün, yaxud başqa otaqda qoyun.
Səhərlər telefonu, ümumiyyətlə qacetləri gözünüzdən qıraqda qoymağa çalışın. Belədə sms, Facebook, Twitter, digər sosial şəbəkələrə hücum çəkib qiymətli vaxtınızı hədər etməzsiniz.
5. Sərin yerdə işləyin.
Çox isti otaqda özünüzü necə əzgin hiss etdiyinizin fərqinə varmısınız heç? Otağın sərin olmasına çalışın, bu, diqqətinizi daha yaxşı cəmləşdirməyə kömək edəcək.
6. Düz oturub, düz dayanın.
Yaxşı işləmək üçün beynin oksigenə ehtiyacı var. Ağciyərlər rahatca genişlənib-yığılmalıdır ki, orqanizmi oksigenlə təmin edə bilsin. Bu, çox bəsit səslənir. Amma iş burasındadır ki, adamların çoxu kompüter arxasında belini əyir, donqarlanıb oturur. Deməli, bu zaman sinələri yığılır, diafraqma ağciyərlərin aşağısını sıxır, dərin və asan nəfəs almaq mümkün olmur. Düz oturun, yaxud ayağa qalxıb qamətinizi düzəldin, o zaman hiss edəcəksiniz ki, daha yaxşı nəfəs alırsınız. Nəticədə beyninizə hava daha yaxşı çatacaq və diqqətinizi daha yaxşı cəmləşdirə biləcəksiniz.
7. Yemək mükafatınız olsun.
Hərdənbir səhər aclığı etmək olar. Yəni səhər öncə bəzi işləri görün, ondan sonra isə mükafat olaraq, günortaüstü qəlyanaltı edin.
8. Səhər "ayini" - hazırlıq.
Günə başlamadan öncə ona hazırlaşmaq lazımdır: 10 dəqiqə meditasiya etmək, soyuq duş almaq, gimnastika etmək. Belə bir "ayin" beyninizə siqnal göndərir ki, artıq gün başlayıb, işə başlamaq vaxtıdır.
Həmçinin unutmayın: hər səhər etdiyiniz işlər bütün gününüzə, eləcə də bütövlükdə həyatınıza necə yanaşdığınızın göstəricisidir.
Sağlam olun!
Mənbə: Milli.Az
XƏBƏR LENTİ
- ŞƏRHLƏR