Ramazanda düzgün qidalanma
69 411
32
1. Bol su için
Bu il çox isti keçəcəyi təxmin edilən Ramazanda gün içində itirdiyimiz suyu təkrar qazanmaq üçün iftardan sahura qədər olan müddətdə orta hesabla 2 litr su içməliyik. İçdiyimiz digər isti və ya soyuq içkilər əsla suyu əvəz edə bilməz.
2. İçkilərə şəkər qatmayın
Günümüzün şərtlərinə görə, artıq bir çoxumuz oturaq (hərəkətsiz) həyat tərzi keçiririk. Bu da qəbul etdiyimiz kalorilərin xərclədiklərimizdən daha çox olmasına səbəb olur. Bu vəziyyətdə qəbul etdiyimiz kaloriləri azaltmağımızı təmin edəcək bir addım da çay və ya qəhvə kimi içkilərə əlavə etdiyimiz şəkəri azaltmaq, hətta həyatımızdan çıxarmaq olacaq. Bir həftə müddətində şəkərdən uzaq dayandığınız təqdirdə, bu dada alışacaq və daha əvvəl içdiklərinizin sadəcə şəkərli su olduğunu anlayacaqsınız.
3. Duzu süfrənizdən götürün
Ölkəmizdə dünya standartlarına görə, 3 dəfə daha çox duz istifadə edildiyini bilirdinizmi? Bu vəziyyət hər şeydən əvvəl sağlamlığımız üçün böyük bir təhlükədir. İstifadə etdiyimiz duz miqdarını azaltmaq üçün ilk olaraq süfrəyə gələn yeməyə duz tökməməyə diqqət etməliyik. Önümüzə gələn yemək duzlu və ya duzsuz da olsa, yeməyi olduğu kimi yeməyə adət etməliyik. Beləcə, bir yeməkdən çox duz almış olsaq da, sonrakı yeməyin duzsuz olması gündəlik duz balansını pozmaz. Buna vərdişi etdikdən sonra həyata keçirməyimiz lazım olan ikinci mərhələ də, bişirdiyimiz yeməklərə əlavə etdiyimiz duz miqdarını azaltmaq olmalıdır.
4. Ağ çörəkdən istifadə etməyin
İşlənmiş çörək olan ağ çörək yerinə, daha təbii olan (buğda, çovdar və s.) çörəklərdən istifadə etməyə çalışın. Bu cür tam taxıllı çörəklərin tərkibi zəngin olduğu üçün insanın daha uzun müddət tox qalmağını təmin edər və qan şəkərinizin normal olmasına kömək olar. Ramazanda xəmir yeməklərindən olduqca az yeməyə diqqət göstərməliyik.
5. Yemək vaxtlarınıza diqqət yetirin
Ramazanda yalnız iftar və sahura yüklənmək yerinə, az və tez olacaq şəkildə qidalanmağa çalışmalıyıq. İftar ilə sahur arasındakı müddətdə yeməklərinizi 4-5 paya bölərək yesəniz, Ramazanda oruc vaxtlarımızı daha rahat keçirərsiniz.
6. Sahura laqeyd yanaşmayın
Xüsusilə erkən qalxıb işə gedənlər üçün sahura qalxmaq ümumiyyətlə çox çətin olur. Ancaq bu il çox uzun saatlar boyunca oruclu qalacağımızı unutmamalıyıq. Yalnız bir əvvəlki gecə edilən iftar ilə oruc tutmaq sağlam bir vəziyyət olmadığına görə, sahura qalxıb bu payı mütləq yeməlisiniz.
7. Sahura doğru qidalar seçin
Sahurda duzlu və bizi narahat edə biləcək qidalardan uzaq dayanmalıyıq. Burada bədənimizi tanımaq və hansı qidaların bizi narahat etdiyini bilmək çox əhəmiyyətlidir. Bol su və göyərtidən istifadə etməliyik. Bunun yanında sahurda yeyəcəyimiz yumurta, ağ pendir və tam taxıllı çörəklər bizi daha uzun müddət tox tutacaqdır. Çox yağlı qidaların mədəni gün ərzində narahat edə biləcəyini və kilonuzun artmasına səbəb ola biləcəyini unutmayın!
8. Yemək bişirərkən duru yağdan istifadə edin
Duru yağlar (zeytun yağı, günəbaxan yağı, fındıq yağı və s.) ürək dostu yağlardır. Bu səbəblə yeməklərimizi bu yağlardan istifadə edərək bişirməyi vərdiş halına gətirməliyik.
9. İstifadə etdiyiniz yağ miqdarını azaldın
Ət və ya ətli tərəvəz yeməkləri bişirərkən heç yağ əlavə etmədən öz yağında bişirin. Ətsiz tərəvəz yeməkləri üçün isə 1 kq tərəvəz üçün ən çox 2 yemək qaşığı duru yağdan istifadə edin.
10. Boşqablarınızı kiçildin
Ramazanda bir çox adamdan eşitdiyimiz "Bir qab şorba içdim, doydum" sözünü bu dəfə həyata keçirmənin zamanı gəldi. Bu il iftar süfrəsində boşqablarınızı (porsiyalarınızı) azaltmağa diqqət edin. İftar süfrələrini normala görə daha sürətli toxluq hiss yaratdığına görə, iftardan sonra yeməyə davam etsəniz, bu, gecə boyu sizə narahatlıq verə bilər. Bu səbəblə iftar süfrələrindən narahat olmadan qalxmağa diqqət göstərək.
Allah cümlə müsəlman bacı, qardaşların orucunu qəbul etsin!
XƏBƏR LENTİ
- ŞƏRHLƏR