“Bu yam-yaşıl, bərəkətli torpaqlarda yaşayan insanların da dünyanın digər bölgələrində yaşayan insanlar kimi öz torpaqlarında hüzur içində yaşamaq haqqı var”. ANS PRESS-in məlumatına görə, bu sözləri TürkiyəninAzərbaycandakı səfiri Alper Coşkun bu gün 80 ölkənin Azərbaycandakı nümayəndə heyətinin, səfirinin cəbhə bölgəsinə etdiyi səfəri zamanı bildirib.
Türkiyəli səfir ermənilərin son zamanlar atəşkəsi pozaraq Azərbaycanın cəbhəyanı kəndlərində yaşayan mülki əhalini atəşə tutması nəticəsində dağılan evlərlə tanış olub və sakinlərlə söhbət edib.
Gördüyü mənzərə qarşısında təəssüf hissi keçirən Alper Coşkun yaxın zamanda Dağlıq Qarabağ münaqişəsinin həll olunmasının vacibliyini qeyd edib. Alper Coşkun diplomatların hər şeyi öz gözləri ilə görmələrinin mühüm olduğunu bildirib.
“Bu insanların yaşam haqlarına nə kimi bir təcavüz edildiyini öz gözlərimizlə gördük. Bu işğal vəziyyətinin tezliklə sona çatdırılmasını, Azərbaycan torpaqlarının bu ölkənin ərazi bütövlüyü çərçivəsində ən qısa zamanda geri qaytarılmasını istəyirik”, - deyə Alper Coşkun cəbhə bölgəsinə səfəri zamanı bildirib.
Mənbə: ANS PRESS
XƏBƏR LENTİ
