Ermənistan müdafiə naziri Seyran Ohanyan ordumuzun Türkiyə Hərbi Birləşmələrilə birlikdə keçirdiyi hərbi təlimlər barədə danışıb.
ANS PRESS-in Ermənistan mətbuatına istinadən verdiyi məlumata görə o, bildirib ki, Ermənistan tərəfi Türkiyə ilə
Azərbaycanın birgə keçirdiyi hərbi təlimləri diqqətlə izləyir. Jurnalistin erməni əhalinin hərbi təlimlərdən sonra təşvişə düşməsilə bağlı xatırlatmasına Seyran Ohanyan sakitləşdirici şəkildə cavab verib.
“Bu strateji hərbi tədbirlərin tərkib hissəsidir. Ermənistan üçün bunun hansısa təhlükəsi yoxdur”, - deyə Seyran Ohanyan bildirib.
Qeyd edək ki, Silahlı Qüvvələrdə irimiqyaslı təlimləri sentyabrın 13-dən başlayıb.
ANS PRESS-in Müdafiə Nazirliyinə istinadla verdiyi məlumata görə, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin təsdiq etdiyi plana əsasən sentyabrın 13-dən 20-dək Azərbaycan Respublikası Silahlı Qüvvələrinin bütün qoşun növlərinin, o cümlədən Türkiyə Respublikası Silahlı Qüvvələrinin hərbi hissələrinin cəlb olunması ilə mərhələli surətdə irimiqyaslı əməliyyat-taktiki və komanda-qərargah təlimləri davam edir.
Ali Baş Komandanın şəxsi göstərişinə əsasən təlimlər zamanı birləşmə və hissələrin səfərbərlik tapşırıqlarının yerinə yetirilməsi səviyyəsinin yoxlanılması məqsədilə ehtiyatda olan 10.000 nəfərədək hərbi vəzifəli təlim toplanışına cəlb edilib.
Təlimin planına uyğun olaraq döyüş hazırlığı çərçivəsində onlarla silah və hərbi texnikadan istifadə qaydaları üzrə praktiki məşğələlər, döyüş atışları, mənəvi-psixoloji hazırlıq və döyüş uzlaşması üzrə tədbirlər keçirilir.
Mənbə: ANS PRESS
XƏBƏR LENTİ
- ŞƏRHLƏR