Ərdoğanın yeni kabineti nəyi dəyişəcək?

27.12.2013-14:00

11 632

Türkiyənin hüquq sistemi dekabrın 26-da ciddi bir kriz yaşayıb. Ölkədə başladılacaq ikinci böyük rüşvət əməliyyatı ilə bağlı sənədlər əməliyyatı yürüdəcək prokuror Müəmmər Akkaşdan alınıb. Buna səbəb kimi Akkaşın istintaq sirrini yayması göstərilib. M.Akkaş isə açıqlama verərək baş verənləri hökumət basqısı adlandırıb.Yada salaq ki, Türkiyədə daha bir rüşvət əməliyyatına başlanacağı haqda 2 gün öncədən xəbərlər yayılmağa başlamışdı. Yerli medianın yazdığına görə, ikinci əməliyyat birincidən daha irimiqyaslı olacaq və hökumətin daha bir neçə üzvünün bu cinayətlərdə əli olduğu ortaya çıxacaq. Ancaq dekabrın 26-da Akkaşın həbs ediləcək şəxslərin siyahısını İstanbul Əmniyyət Müdürlüyünə verdiyi, ancaq polisin həmin şəxsləri saxlamaqdan imtina etdiyi bəlli olub. Ardınca isə Akkaş istintaq prosesindən kənarlarşdırılıb. Baş prokurorun müavini Oktay Ərdoğan bu haqda açıqlamasında deyib ki, əməliyyatı o, ya da onun rəhbərliyi ilə başqa bir prokuror yürüdəcək. M.Akkaş isə istintaq sirrini yayması ilə bağlı iddiaların əsassızlığı, baş prokurorluğun ona təzyiq etdiyini deyir: “İş üzrə ifadə almam əngəlləndi. Şübhəlilərin qaçmasına şərait yaradıldı, dəlillər məhz edildi. Əldə etdiyim dəlilləri baş prokurora təqdim etmişdim. Araşdırmam əsasında şübhəli şəxs kimi saxlanacaq şəxslərin siyahısını İstanbul polisinə göndərmişdim. Dövlətin üç təməl qolundan biri olan məhkəmə hakimiyyətindəki bu özbaşınalığa etirazımı bildirirəm, hüquq sistemində çalışan bütün məslək arkadaşlarımı duruma etiraz etməyə çağırıram”.Bu arada üç nazirin vəzifəsindən istefa verməsindən sonra baş nazir Rəcəb Tayyib Ərdoğan kabinetin daha 10 üzvünü dəyişdiyini açıqlayıb.Prezident Abdulla Güllə görüşündən sonra baş nazir Ərdoğan media qarşısına çıxıb. Çıxışına “bəzi arkadaşlarımız mövcud gəlişmələrlə bağlı vəzifələrindən azad edilmələrini istədilər. Bəzi nazirlərimiz isə bələdiyyə başqanlığına namizəd olduqları üçün vəzifələrini tərk edir. Bəzilərinin vəzifədən getməsi isə mənim prezidentlə və onların özləri ilə məsləhətləşmələrimdən sonra baş verdi” deyib.Türkiyə mediası yeni kabinetin tərkibi ilə bağlı xəbərlərdə baş nazirin “sağ əli”ni daxili işlər naziri postuna gətirməsinə diqqət çəkdi. Ərdoğan bu posta uzun illərdir ən yaxın çevrəsində olan Efkan Alanı təyin edib.Keçmiş daxili işlər naziri Müəmmər Gülər son çıxışını “kaş xəncəri başqaları vuraydı. Onlara haqqımı halal etmirəm” sözləri ilə tamamlayıb. Yeni daxili işlər naziri Ala isə ilk çıxışında Türkiyənin qüvvətlənməsi üçün çalışacağını vəd edib: “Biz baş nazirin göstərişi ilə Türkiyənin bu inkişaf tempini saxlaması üçün əlimizdən gələni edirik və edəcəyik”.

Ərdoğan yerli telekanallarında birinə açıqlamasında istefa edən nazirləri müdafiə edib. Müsahibənin maraqlı məqamlarını təqdim edirik.
- Əməliyyatda açar isim kimi Rza Zərrabın adı keçir. Bu iş adamı haqqında nə bilirsiniz?
- Qızıl ixracı ilə məşğul olan birisidir. Ölkəyə qatqılarının olduğunu bilirəm. Xeyriyyəçiliklə məşğul oluğunu bilirəm.
- Avropa Birliyi naziri Egemen Bağışın adının qarışdığı görüntülər yayılmışdı...
- Avropa Birliyi nazirinin ofisinə çanta ilə girdi, çantasız çıxdı deyirlər. Çanta Bağışa verilərkən bir görüntü varmı? Belə bir hüquq sistemi, belə bir yanaşma ədalətli ola bilərmi? Bəlkə o, çantada kitab aparıbmış? Belə çıxır daha heç kim hansısa ofisə çanta ilə getməsin? Zəfər bəyin (iqtisadiyyat naziri Zəfər Çağlayan) oğluna geyim göndərdiyini deyirlər. Uydurma şeylərdir.
- Əməliyyatın əsl hədəfində siz var idiniz, deyirlər? Bu iddiaları qəbul edirsiniz?
- Buralardan Rəcəb Tayyib Ərdoğanı vurmağa çalışsalar, əmin olsunlar ki, heç nə bacarmayacaqlar. Bunu bildikləri üçün də ətrafıma hücuma keçiblər. TÜRGEV üzərindən oğlum Bilalın adı gündəmə gətirilir. Guya bu vəqfə qaynağı bəlli olmayan pullar köçürülüb. Hamısı əsassızdır. Fatih bələdiyyəsinin tikdiyi binanın təhsillə bağlı vəqfə 25 illiyinə kirayə verilməsi deyilir. Məgər bu qanunsuz hərəkətdir? Qətiyyən belə deyil. Həmin bina tələbə yataqxanasıdır, Bilal Ərdoğanın hoteli deyil. Oğlum Bilal, qızım Əsra, digər qohumlarım həmin vəqfin idarə heyətinin üzvləridir. Bu bir xeyriyyə qurumudur. Mən həmin yüksək standartlara cavab verən həmin tələbə yataqxanası ilə öyünürəm.
- Sizcə, baş verənlər 30 mart bələdiyyə seçkilərində AKP-nin yığacağı səsə təsir edəcəkmi?
- Buna inanmıram. Bu günlərdə də xalq AKP-ni dəstəkləyir. Biz xalqla təmaslardan nə yayınırıq, nə də usanırıq. Bu basqılar bizim sıralarımızı daha da çoxaldacaq. Əsərlərimiz ortadadır. Bu iqtidar korrupsiyaya qurşansaydı, o əsərləri nə ilə yapacaqdıq? Bu arada Türkiyədə ötən gün lirənin bir qədər də ucuzlaşdığı bəlli olub. Axşama doğru 1 dollar 2.14 lirədən satılıb. Bu, türk lirəsinin yarandığı dönəmdən bu yana ən aşağı səviyyəsidir. Ölkədə maliyyə böhranı yaranmaması üçün Mərkəzi Bank prosesə müdaxilə etməyə çalışır. Ancaq lirənin səviyyəsini stabil saxlamaq cəhdləri hələ ki uğursuzdur. İstanbul birjasında da səhmlərin qiymətlərində ciddi enmələr müşahidə edilir. Orta hesabla hər gün İstanbul birjası 2,40 faiz enmələrlə işini başa vurur. İqtisadçıların hesablamalarına görə, bu günlərdə Türkiyə iqtisadiyyatına 100 milyardlarla dollar ziyan dəyib. Bu arada Rza Zərrabın həkimi “Yeni Müsavat”a danışıb. “Rza Zərrabın böyrəyində problem olması doğrudur. Ancaq bu xəstəlik həyat üçün riskli sayılmır. Onun xərçəngdən əziyyət çəkməsi xəbərləri doğru deyil”. Bu sözləri “Yeni Müsavat”a açıqlamasında rüşvət əməliyyatında həbs edilən iş adamı Rza Zərrabın həkimi deyib.İstanbul klinikalarından birində çalışan həkim (adı bizə bəlli olsa da müəyyən məqamlara görə açıqlamırıq) deyib ki, Rza Zərrabın böyrəküstü vəzində kist var: “Bu davamlı müalicə ilə sağala bilən xəstəlikdir. Xüsusi ehtiyac olduqda isə cərrahi müdaxilə ilə götürülə bilər. Ancaq bu zamana qədər belə bir ehtiyac yaranmayıb. Onun xəstəliyi heç bir halda ölüm təhlükəsi yarada bilməz”.
Rza Zərraba yaxın qaynaqlar onun xəstəliyinin ciddi olduğunu bildirir. Türkiyənin ünlü sənətçilərindən İbrahim Tatlısəs də bir neçə gün öncə Rzanın xərçəng xəstəliyindən əziyyət çəkdiyini deyib. Onun sözlərinə görə, Rza qısa müddət öncə bu haqda özü Tatlısəsə deyib. Bir sıra qaynaqlar isə iddia edir ki, 29 yaşlı Rza Zərrab “xəstəliyini” bəhanə edərək istintaq prosesində özünə daha üstün mövqelər qazanmağa çalışır.

Mənbə: Milli.Az