Azərbaycanda ölüləri yeni qaydalarla basdıracaqlar. Özəl və bələdiyyə qəbristanlıqlarının yaradılması ilə bağlı Nazirlər Kabineti müvafiq qərar verəcək. Dini Qurumlarla İş üzrə Dövlət Komitəsində isə artıq yeni sənəd hazırdır. Qəbristanlıqlar bələdiyyələrin tərkibində yaradılacaq qurumlar tərəfindən idarə olunacaq.
Yeni qaydalara görə, təzə qəbristanlıqlarda ailəvi məzarlıqlara icazə verilməyəcək. Yalnız ər və arvadın vəsiyyətnaməsinə əsasən, onun yanında həyat yoldaşını basdırmaq üçün bir yer saxlanıla bilər. Digər qohumlar isə qəbristanlığın qeydiyyat kitabındakı nömrələnmə siyahısına uyğun basdırıla bilərlər.
Hər bir məzarın ümumi sahəsinin 5 kvadrat metr olacağını deyib. Məzarın içi 1 metr, uzunluğu isə 2 metr, başdaşının hündürlüyü 60 sm, eni 40 sm kimi müəyyənləşdirilir. Sinə daşının yerdən olan hündürlüyü isə 30 sm kimi nəzərdə tutulub.
Lakin burada da bir çox suallar açıq qalıb. Sənəddə imkansız ailələrin dəfninin həyata keçirilməsi ilə bağlı məsələlər də öz əksini tapıb.
Azərbaycanda dünyasını dəyişən insanların dəfni ilə bağlı bütün xərclərin dövlət və bələdiyyələr tərəfindən ödənilməsi təklif edilir. Milli Məclisin Sosial siyasət komitəsinin sədr müavini Musa Quliyev hələ ötən il qəbirin yerləri icra hakimiyyəti orqanları, yaxud bələdiyyələr tərəfindən vətəndaşlara verildiyini deyib. "Ancaq qəbirin hazırlanması, qəbir daşının sifarişi, qoyulması, ümumiyyətlə, dəfn prosesinin təşkili xərclərini vətəndaşlar ödəyirlər".
Dini baxımdan da dəbdəbəli dəfnlər, qəbrlər məqbul hesab edilmir. İlahiyyatçı İsmayıl Əhmədovun sözlərinə görə, yeni qaydaların ən əsası israfçılığın qarşısını alacağını düşünür. O qeyd edib ki, əslində qəbr yerlərinin pulla satılması məsələsi də bununla öz həllini tapacaq.”Bu məsələ dində öz əksini tapmasa da, qəbrin pulla satılmaması məsləhətdir. Düzdür, bəzən özəl qəbristanlıqlara qulluq məqsədi ilə cüzi haqq alına bilər. Bundan isə məzarlığa xidmət, təmizliyin qorunması üçün istifadə edilə bilər”.
Qanunun geriyə işləmə qüvvəsi olmadığından qəbul ediləcək yeni qaydalar indiyədək tikilən qəbrlərə aid edilməyəcək. Qaydaların tətbiqinə isə bu ilin ikinci yarısından başlanması nəzərdə tutulur.
Qəbristanlıqlarda olan ikinci bir pqroblem isə natəmizliklə bağlıdır. Ölülərini ziyarət etmək üçün gələnlər bəzi məzarlıqlardakə vəziyyətin ölənlərin ruhuna təhqirdən başqa bir şey olmadığını deyirlər.
Mənbə: Milli.Az
XƏBƏR LENTİ
- ŞƏRHLƏR