İspaniyanın Kaseres şəhərində yeniyetmə və gənclər arasında sambo üzrə Avropa birinciliyində 7 medal qazanan yığma üzvlərindən ikisi Gəncə sambo məktəbinin yetirməsidir.
Milli.Az Kəpəz TV-yə istinadən xəbər verir ki, qitə birinciliyində Nizami yurdunun samboçularından Elvin Ağayevlə Etibar Zeynalov medal qazanıblar. Əldə olunan uğur münasibəti ilə idmançıları və onların şəxsi məşqçilərini qəbul edən Gəncə şəhər Gənclər və İdman Baş İdarəsinin rəisiMüşfiq Cəfərov nəticəni müsbət qiymətləndirib. O, ilk dəfə Avropa birinciliyində həyəcan yaşayan hər iki samboçunun çıxışının mükafatla əlamətdar olmasını önə çəkən Ağayevin gənclər arasında 62 kq-da gümüş, Zeynalovun isə 87+ kq-da bürünc medal qazandığını bildirib.
Nəzərinizə çatdıraq ki, beynəlxalq turnirlərin mükafatçısı Elvin Ağayev Gənclər və İdman İdarəsinin nəzdində fəaliyyət göstərən Uşaq Gənclər İdman Məktəbindən əməkdar məşqçi Ceyhun Bayramovun, 1 saylı UGİM-in idmançısı olan Etibar Zeynalov isə əməkdar məşqçi Əli Hacıyevin yetirməsidir.
İdmançıların uğuru haqda danışan Əli Hacıyev sambonun Gəncədə köklü idman növlərindən biri olduğunu, şəhərdə Mövlud Mirəliyev, Şahmuraz Qasımov və Hakim Nəzərəliyev kimi dünya çempionlarının yetişdiyini vurğulayıb. Ceyhun Bayramov isə hazırkı yeniyetmə və gənc nəsli bu adlı-sanlı samboçuların yolunun layiqli davamçıları hesab etdiyini qeyd edib. Gəncə idman ictimaiyyətinin çıxış edən digər simaları qitə yarışının mükafatçılarını təbrik edərək, uğurların davamlı olmasını arzulayıb. Görüşün sonunda Gəncə şəhər Gənclər və İdman Baş İdarəsi adından samboçulara fəxri fərman və xatirə hədiyyələri təqdim olunub.
XƏBƏR LENTİ
- ŞƏRHLƏR