Xoşbəxt ailə həyatının əsasını təşkil edən nüanslardan biri də həyat yoldaşımızın bacısı, yəni baldızımızla münasibətlərin yaxşı olmasıdır. Həm gəlin baldızını, həm də baldız gəlini bacısı kimi sevə bilməlidir. Əgər sevməsələr belə, bunu üzə vurmamalı, bir-birlərinə hörmətlə yanaşmalıdırlar. Pisliyə pisliklə cavab verməmək, sülh yolunu seçmək lazımdır. Bizə pislik edənə yaxşılıqla cavab verdikdə bir müddət sonra qarşımızdakı səhvini anlayacaq və peşmanlıq duyacaqdır.
Bəzi insanlar özlərində başqalarının həyatını idarə etmək, əmr vermək, özəl həyatına nəzarət etmək haqqını görürlər. Buna gəlin-baldız münasibətlərində daha çox rast gəlinir. Təzə gəlin yeni həyata qədəm qoyur, özünə xas yaşayış tərzi qurmaq istəyir. Baldız isə öncədən qurduğu həyat tərzini qorumaq istəyir, dəyişikliyə qarşı çıxır. Belə olduqda hər iki tərəf özünü qəbul etdirmək üçün bir-birlərinə müdaxilə edir ki, bu da bir sıra problemlər yaradır. Belə halda problemləri böyütmədən həll etməyə çalışmaq lazımdır.
Gəlin-baldız arasında yaranan problemlərdən biri də ev işlərini bölüşə bilməməkdir. İşləri gözümüzdə o qədər böyüdürük ki, 2-3 saata bitəcək işləri sanki bitməyəcəkmiş kimi görürük. Halbuki, birlikdə çətin işləri asanlıqla və qısa müddətdə görüb bitirə bilərik. Unutmayın ki, güc birlikdədir. Gəlin və ya baldız qarşısındakını gözləmədən işlərə başlamalıdır. Bir-birinin tənbəlliyini və ya astagəlliyini səbəb göstərərək mübahisə etməməlidir.
Problemlər təkcə eyni evdə yaşayanlar arasında deyil, ayrı evdə yaşayan gəlin və baldızlar arasında da yaranır. Bu problemlərdən biri ayrı yaşayan baldızın evin içindəki hər hansı bir problemə müdaxilə etməsidir. Əslində o bu problemə müdaxilə etməməlidir, amma əgər özünü saxlaya bilməyib yenə müdaxilə edirsə, o zaman ədalətli olmalı, tərəf saxlamadan məsləhət verməlidir.
Daha bir problem də ailəli baldızın uşaqları ilə ata evinə gəlməsinin evdəki gəlini narahat etməsidir. Halbuki, həftədə bir dəfə belə olsa evin qızının ailəsiylə bərabər olmaq istəməsi onun haqqıdır. Bu vəziyyət gəlinə ağır gəlməməlidir. Əslində hər iki tərəf bir qədər anlayışlı olarsa, heç bir problem yaranmayacaq. Qonaq gələn baldız gəlinə işlərdə bir qədər kömək etsə, uşaqlarının dəcəlliklərinə göz yummayıb onlara göz-qulaq olarsa, yəqin ki, bu vəziyyətdən heç bir gəlin narahat olmaz. Əgər gəlin özü də baldızdırsa, özünü baldızının yerinə qoya bilər. Atası evinə qonaq getdikdə qardaşının həyat yoldaşı ona üz turşutsa, özünü necə hiss edər?
Gəlin belə düşünməlidir: "Atasının evidir, əlbəttə ki, gələcək. Ailəsini ziyarət etməsi onun İslami və insani haqqıdır. Mənim necə ata evində rahat olmağa haqqım varsa, onun da rahat olması onun haqqıdır".
Ailə həyatınızın yoldaşınızla, qaynananızla, baldızınızla rahat, xoşbəxt və ən xeyirli şəkildə davam etməsi ümidiylə...
XƏBƏR LENTİ
- ŞƏRHLƏR