21.11.2013-23:00

• Xəbərlər

31 121

1

Avtomobil sığortası və uşaq məsələsinə baxan hakim
Vəkil Ceyhun Cəfərli də sözügedən layihənin qəbulundan sonra uşaq məhkəməsinin yaranacağını və bunun hər bir ölkə üçün vacib olduğunu dedi: “Bu gün Azərbaycanın məhkəmə sistemindəki mənzərəyə diqqət yetirsək, görərik ki, hakimlər vaxt çatışmazlığı ucbatından, inzibati təşkilatçılıq, maddi-texniki təchizat baxımından bəzən işlərə ötəri baxırlar. İşlər o qədər çox olur ki, hər işi dəqiqliklə, hərtərəfli araşdırmağa zamanları olmur. Qonşu mübahisələri, bir-biri ilə yumruqlaşma, hasarın, darvazanın sökülməsi işindən sonra məhkəmə bir də görürsən uşaq işinə keçir. Məsələn, uşağın kimin yanında qalması, aliment məsələsinə baxır və məsələni onca dəqiqəyə həll edir. Çünki sırada hələ başqa işlər də var. Bir sözlə, bir hakim qonşu işindən uşaq işinə, uşaq işindən kredit məsələsinə, kreditdən avtomobil sığortasına keçərək mübahisələri həll edir. Bu zaman uşağın gələcəyini həll edən ədalətli qərarın veriləcəyi bir az çətin olur”. C.Cəfərli qeyd etdi ki, uşağın gələcəkdə tərbiyəsi, maddi təminatı, düzgün qidalanması, təhsili məsələlərinə kompleks nəzər yetirmək lazımdır və hakimlərin bütün bunları nəzərə almağa zamanları olmur: “Bu cür məsələləri bir məhkəmə işinə sığışdırıb həll etmək praktiki olaraq vaxt baxımından mümkün deyil. Bir çox inkişaf etmiş ölkələrdə ayrıca ailə məhkəmələri var. Azərbaycanda da ayrıca ailə-uşaq mübahisələri ilə bağlı məhkəmələrin olması vacibdir. Bu məsələlərlə bağlı nəinki ayrıca qanunlar qəbul olunmalı, eyni zamanda struktur idarələr yaranmalıdır”. Müsahibimiz uşaqların hüquqlarına səthi yanaşılmasından narahat olduğunu bildirdi: “Əgər valideynlər boşanırsa, uşaqların hansı valideynin yanında qalma məsələsi araşdırılırsa, məhkəmədə 10 yaşına çatmış uşağın fikri öyrənilə bilər. Hansı formada öyrənilə bilər? Məhkəmədə psixoloq, uşağın müəllimi, həkim-nevropatoloq iştirak etməlidirmi? Bütün bu məsələlər yeni qəbul olunacaq “Yuvenal ədliyyə haqqqında” qanun layihəsində öz əksini tapmalıdır. Düşünürəm ki, bu cür məhkəmələrdə indikindən fərqli olaraq, Ailə, Qadın və Uşaq Problemləri üzrə Dövlət Komitəsinin nümayəndələri də iştirak etməlidir”. Məsələ ilə bağlı millət vəkili Çingiz Qənizadə ilə danışdıq. Ç.Qənizadə bildirdi ki, “Yuvenal ədliyyə haqqında” qanun layihəsinin müzakirəsi parlamentin payız sessiyasına salınmayıb. Millət vəkili qanun layihəsinin nə vaxt qəbul ediləcəyi barədə məlumatı olmadığını bildirdi.

Mənbə: Kaspi.Az

0 0

[lang=az]Şikayət et[/lang] [lang=en]Complain[/lang] [lang=ru]Пожаловаться[/lang] [lang=tr]Şikayetçi ol[/lang]

Deniz84