Əziz xanımlar, bu gün sizlərə təqdim etmək istədiyim yemək bölgəmiz Lənkəranın bütün məclislərində, eləcə də qonaq üçün açdığımız süfrənin ən şah yeməyidir. Biz tərəflərdə buna ''Şirin qovrulmalı aş qarası'' deyirlər. Amma yeməyin kökünün Qarabağımızdan olmasını mən Gülşən xanımın ''Qarabağ bölgəsinin mətbəxi'' adlı xəbərindən öyrəndim və sevə-sevə bişirib sizləri də tanış edirəm. Buyurun:
Tərkibi:
2-3 ədəd soğan
100 q qoyun əti
Qaysı
Albuxara
Kişmiş
Darçın
Zəfəran
2 x.q şəkər tozu
2 x.q doşab
Kərə yağı
"Azərduz" yodlu narın xörək duzu
Hazırlanması:
Əvvəlcə soğanı doğrayırıq, əti qaynadıb kəfini alırıq, suyuna duz qatırıq. Bulyonunu bir qırağa qoyuruq. Çərəzləri ilıq suda isladırıq.
Soğanı yağda azacıq qovururuq, sonra üzərinə ət tikələrini əlavə edirik.
Bir az qovurandan sonra isə islatdığımız çərəzləri əlavə edib, rəngi dəyişənədək qovurmaq lazımdır.
Dərin qazan götürüb bayaq qovurduğumuz ərzaqları içinə töküb, şəkər tozu, doşab və ədviyyatları qatırıq, lap sonda isə ayırdığımız ətin bulyonunu əlavə edirik.
Zəif odda, suyu çəkilənədək dəmə qoyuruq.
Zəfəranlı, süzülmuş düyü ilə istədiyiniz formada süfrəyə verə bilərsiniz.
Nuş olsun!
XƏBƏR LENTİ
- ŞƏRHLƏR