Hər bir xalqın sevimli mantı yeməyi vardır, ən çox da türklər bizdə "düşbərə" adı ilə tanınan yeməyə "mantı" deyirlər. Mən isə öz damaq dadıma uyğun olaraq mantını kartofla, ətlə və soğanla edirəm. Mantı buxarda bişən yemək olduğu üçün bişirmək üçün xüsusi qazan lazımdır. Mən isə, buxar qazanım olmadığı üçün aşsüzəni içində su olan qazana qoyub, ağzını da həmin qazanın qapağı ilə bağlayıram və fikir vermək lazımdır ki,buxar kənarlara çox çıxmasın.
Tərkibi:
İçlik üçün:
10 ədəd orta ölçüdə kartof
3 ədəd orta ölçüdə soğan
0,5 kq ət qiyməsi
duz, istiot.
Xəmir üçün:
2 kasa un
duz və adi ilıq su
Aşsüzəni yağlamaq üçün duru yağ.
Hazırlanması:
Əvvəlcə kartofu, soğanı uzunsov və nazik doğrayırıq, çəkilmiş əti də qatırıq.
Sonra üzərinə duz və istiot əlavə edib əl ilə yaxşıca qarışdırırıq.
Un, duz və su ilə adi qaydada xəmir yoğurub, kündə tuturuq.
Normal lavaş yayırıq və 13 sm dördkünc formada kəsirik.
Həmin hazırladığımız içlikdən xəmirlərə qoyuruq.
Sonra qarşı-qarşıya olan tərəfləri birləşdiririk.
Yenidən qarşı-qarşıya olan tərəfləri də birləşdiririk.
Qıraqlarını cütləyib bitişdiririk.
O biri qıraqlarını da eynən həmin formada.
Aşüzəni yağlayırıq və bir-birinə çox yapışmamaq şərtilə düzürük, qaynayan suyun içərisinə buxarda qoyub, 30-35 dəqiqə qaynadırıq.
Mantıları çıxarıb, üzərinə ərinmiş yağ əlavə edirik. Zövqə görə qatıqla da yeyilə bilər.
Nuş olsun!
XƏBƏR LENTİ
- ŞƏRHLƏR