Bu məktubu oxuyandan sonra bilirəm ki, həyata baxışın dəyişiləcək, çünki sənin gözlərini açacam. Mənim gördüklərimi sən görməmisən, amma görəcəksən, ona görə gecikməmişdən sənə xəbərdarlıq edim. Mən o dünyadan sənə yazacam. İnandırım səni ki, o dünyada heç də hər şey sənin bildiyin kimi deyil. Sizi bu dünyada yalanlarla aldadırlar, sizi cəhənnəm istisi, Allahın cəzası, o dünyada verilən imtahan suallarla aldadırlar, qorxudurlar. Qorxudurlar ki, istədiyin kimi yaşamayasan, ürəyinə xoş işlər görməyəsən, onlar sənin düşmənindir, aldanma əsla! Mən gördüm, nələr gördüm: bu dünyada zalımlıq edənlər elə o dünyada da varlıq içində yaşayırlar, bu dünyada susan “yazıq”lar elə o dünyada da acı vəziyyətdədirlər, başqalarının haqqını yeyib qarnı həmişə tox olanlar o dünyada boş gəzirlər, heç kim onların yaxasından tutub cəhənnəm adlanan yerə atmır. O dünyada boşluq var. Nə cənnət, nə də cəhənnəm var. Ona görə gəl sən belə et, bu dünyada bacardığın qədər keyf çək, onsuz da o dünyada heç nə olmayacaq. Hansı yolla olursa olsun əllərin pulla dolu olsun, haram deyilən şeylərə marağın varsa, onlarla məşğul ol, onsuz da bu dünyada haram heç nə yoxdur. İçki iç doyunca, içki insanın ürəyini xoş edir. Siqaret əsəblərini sakit edirsə, ona da əl at, o da sənin dərd yoldaşındır. Xəyanət etmək istəyirsən? Buyur, nə qədər ürəyin istəyir et! Boş-boşuna ehtiras verilməyib ki, sənə. Nə? Filankəsin paxıllığını çəkirsən? Əşşi, ayağının altını qaz, rahatlaşarsan, söz verirəm sənə. O dünya? Əşşi, o dünyada heç kim nə səndən heç nə istəməcək, nə də pislik etdiyin insanın hallalığına ehtiyacın olmayacaq. Bu dünya əslində sənə verilmiş hədiyyədir, bacardığın qədər gəz, keyf elə, ta ki, ölənə kimi ürəyin nə istəyir elə onu da et. Nə? Quran? Quran da İncil və başqa kitabdan seçilmir ki, sən kitab oxumağı kənara burax, ətrafa bax, gör nə qədər gözəllik var, bunlar hamısı sənin üçündür, insan özü özünə Allah ola bilər. Nə? Allaha özünü bənzətmək günahdır? Axı olmayan şeyə insan necə özünü bənzətsin? Sən heç öz gözlərinlə Allahı görmüsənmi? Həəə, mən də görməmişəm. Amma bax, sən məni görməsən də, mən səninlə danışa bilirəm, sənə yol göstərə bilirəm. Sənin də yeganə çıxış yolun mənə qulaq asmaq, mənim yolumla getməkdir. Mən sənin ən yaxın dostunam.
Nə isə, çox uzun yazaram, amma əsas şeyləri sənə çatdırdım. İndi tələsirəm işim var, gedim qaynayan qazanı qarışdırım, nəsə içi yaman dolur günü-gündən.
Görüşərik!
İmza: Şeytan
- ŞƏRHLƏR