Bakının Səbail rayonu, Bayıl qəsəbəsi, Buxta küçəsi 71, mənzil 13-də yaşayan Allahyarovlar ailəsi gecəni mənzillərində keçirə bilməyib. Buna evlərinin yaxınlığında baş vermiş bir uçqun səbəb olub.
Milli.Az-ın anspress-ə istinadən məlumatına görə, axşam saatlarında evin bir hissəsinə, daha dəqiq, giriş-çıxış qapısının önünə uçqun nəticəsində mişar daşları tökülüb. Sən demə, mişar daşları üst məhlədə olan bir mağazanı qonşu evlərlə birləşdirirmiş. Mağazanın bir hissəsi də uçqundan ziyan görüb.
İlk baxışda da aydın olur ki, uçan hasar və mağaza Allahyarovların evindən yuxarıda, yoxuşlu yolun kənarında, nisbətən boşluq ərazidə tikilibmiş.
Xoşbəxtlikdən, hadisə zamanı xəsarət alan olmayıb. Ancaq ev dağıntı nəticəsində nisbətən qəzalı vəziyyətə düşüb.
Hadisədən sonra FHN-in, eləcə də rayon polisinin nümayəndələri ərazidə olublar. İlk olaraq yaxınlıqdan keçən qaz xətti bağlanıb.
Gecə saatlarına doğru təsadüf etdiyindən hadisənin nəticələrinin aradan qaldırılması və araşdırmaların aparılması üçün gündüz saatlarında əraziyə yeni təhqiqat qrupunun göndəriləcəyi də bildirildi.
XƏBƏR LENTİ
- ŞƏRHLƏR