16:07
"Azərbaycanda ana ölümü hallarının sayı artmayıb. Bu ilin beş ayı ərzində ölkədə 10 ana ölümü qeydə alınıb ki, bu da keçən ilin müvafiq dövründə baş verən hadisələrdən artıq deyil". Bunu Trend-ə eksklüziv açıqlamasında Səhiyyə Nazirliyinin Doğuşayardım Komissiyasının sədri Leyla Rzaquliyeva deyib.
Onun sözlərinə görə, Səhiyyə Nazirliyi tərəfindən hər bir ana ölümü hadisəsi 12 nəfər yüksək ixtisaslı mütəxəssisdən ibarət Komissiya tərəfindən ciddi araşdırılır. Ana ölümündə təqsirli olan hər bir tibb işçisi barədə müvafiq tədbirlər görülür. Cari ilin əvvəlindən bu hadisələrlə bağlı 9-u həkim, 1-i orta tibb işçisi olmaqla, 10 nəfər vəzifəsindən azad edilib, 31 nəfərə qarşı inzibati tənbeh tədbirləri görülüb: "Ümumiyyətlə, doğuşayardım xidməti Səhiyyə Nazirliyinin prioritet sahələrindən biridir və daim diqqət mərkəzindədir. Xidmətin gücləndirilməsi məqsədilə Respublika Perinatal Mərkəzinin direktoru və baş həkimi işdən azad edilib. Mərkəzin rəhbərliyinə daha güclü və məsuliyyətli mütəxəssislər təyin edilib".
Komissiya sədri bildirib ki, respublikanın 2 rayonunun baş mama-ginekoloqları, Bakı Şəhər 3 saylı Klinik Xəstəxanasının doğum şöbəsinin müdiri vəzifələrindən azad olunublar. L.Rzaquliyeva onu da əlavə edib ki, Doğuşayardım Komissiyasının may ayının 22-də keçirilən son iclasında Ağstafa Mərkəzi Rayon Xəstəxanasının doğum şöbəsində və Sabirabad Perinatal Mərkəzində baş vermiş ana ölümü hadisələri təhlil edilərkən bu tibb müəssisələrində doğuşayardım xidmətinin həyata keçirilməsində ciddi nöqsanların olduğu aşkar edilib. Komissiya Ağstafa Mərkəzi Rayon Xəstəxanasının doğum şöbəsinin müdiri Ziba Məmmədovanın və Sabirabad Perinatal Mərkəzinin direktoru Vüsal Məmmədovun tutduğu vəzifədən azad olunması barədə qərar qəbul edib.
Bundan əlavə, ana ölümləri ilə əlaqədar aidiyyəti olan Ağstafa rayon Müğanlı kənd sahə xəstəxanasının baş həkimi İ.Sofiyevə xəbərdarlıq, mama-ginekoloq M.Qocayevaya töhmət, Sabirabad Perinatal Mərkəzinin mama-ginekoloqları R.Rəsulova şiddətli töhmət, O.Əmrahova və M.Yunusovaya töhmət verilməsi barədə qərar verilib.
Komissiya sədrinin sözlərinə görə, Sabirabad Perinatal Mərkəzində doğuşayardım xidmətinin gücləndirilməsi məqsədi ilə Elmi-Tədqiqat Mamalıq və Ginekologiya İnstitutunun mütəxəssisləri oraya ezam olunublar.
Bu il ərzində qeydə alınan ana ölümlərinin səbəblərini də açıqlayan L.Rzaquliyeva bildirib ki, bu halların çoxu hamiləliklə əlaqəsi olmayan patologiyalar nəticəsində baş verib. Bunların ağırlaşmış fəsadlar olduğunu söyləyən L.Rzaquliyeva deyib ki, hamilə qadınlarda qeyd olunan patologiyalar ana ölümü riskini artırır.
Bunun qarşısının alınması üçün hamilələr vaxtında qeydiyyata düşməli, mütəmadi həkimə müraciət etməlidirlər və belə halların baş verməməsi üçün qadınlar arasında geniş maarifləndirmə işləri aparılmalıdır.
------
13:45
“Səhiyyə Nazirliyinin Doğuşayardım komissiyasının keçirdiyi iclasda əsas məqsəd Sabirabad Perinatal Mərkəzində və Ağstafa Mərkəzi Rayon Xəstəxanasında hər birində baş verən 2 ana ölümü faktını müzakirə etmək olub”.Bunu APA-ya açıqlamasında Səhiyyə Nazirliyinin mətbuat xidmətinin rəhbəriAnar Qədirli deyib.
O bildirib ki, Səhiyyə Nazirliyinin Doğuşayardım Komissiyasının iclasında Sabirabad Perinatal Mərkəzinin direktoru Vüsal Məmmədovla yanaşı, Ağstafa Mərkəzi Rayon Xəstəxanasının Doğuş şöbəsinin müdiri Ziba Məmmədova barəsində də vəzifəsindən azad edilməsinə dair qərar verilməsi tövsiyə edilib: “Bundan əlavə, Sabirabad Perinatal Mərkəzində və Ağstafa Mərkəzi Rayon Xəstəxanasında çalışan bir sıra həkimlərə töhmət verilib”.
A. Qədirli əlavə edib ki, Sabirabad Perinatal Mərkəzin direktorunun rüşvət almaq məsələsi olmasaydı belə, hər iki həkim barədə müvafiq qərar veriləcəkdi: “Çünki hər bir xəstəxanada qeydə alınan 2 ana ölümü həmin Mərkəzlərdə işin lazımı səviyyədə təşkil edilməməsi nəticəsində baş verib. Ona görə də bununla bağlı müvafiq tövsiyələr edilib”.
Mənbə:Milli.Az
XƏBƏR LENTİ
- ŞƏRHLƏR