2013-cü ilin sonuna kimi Azərbaycanda internetlə təmin olunmayan kənd qalmayacaq
21 924
2
"2013-cü ilin sonuna kimi Azərbaycanda internetlə təmin olunmayan kənd qalmayacaq". Bu barədə Şabran rayonunda vətəndaşları qəbul edən rabitə və informasiya texnologiyaları naziri Əli Abbasov açıqlama verib.
Milli.Az Regional TV-yə istinadən xəbər verir ki, Rabitə və İnformasiya Texnologiyaları naziri Əli Abbasov Şabranda bu rayondan, eləcə də Quba, Qusar, Xaçmaz, Siyəzən və Xızı rayonlarından olan vətəndaşları qəbul edib. Görüş zamanı rayonlarda yerləşən nazirliyə tabe olan digər struktur rəhbərləri ilə də video konfrans təşkil olunub. Nazirliyin struktur rəhbərlərinin iştirakı ilə keçirilən qəbul zamanı vətəndaşların müraciətlərinə baxılıb. Qəbulda son zamanlar informasiya kommunikasiya texnologiyaları ilə bağlı regionlarda müşahidə olunan inkişafa görə təşəkkürlərini ifadə etməyə gələn vətəndaşlar üstünlük təşkil edib.
Vətəndaşların müraciətlərində qaldırılan məsələlər nazirliyin müvafiq qurumlarının əməkdaşlarının iştirakı ilə araşdırılıb, müraciətlərin bəziləri yerindəcə həllini tapıb.
Qəbuldan sonra jurnalistlərə açıqlamasında nazir bildirib ki, elektron hökumət effektiv işləməyə başlayıb və bu sahədə kifayət qədər irəliləyişlər qeydə alınmaqdadır. Onun sözlərinə görə, 2013-cü ildə əhaliyə 200 min müxtəlif xidmətlər elektron hökumət vasitəsilə təqdim olunub. Həmçinin internetdən istifadənin daha da genişləndirilməsi məqsədilə bir sıra layihələr, tədbirlər həyata keçirilir. Buna misal olaraq özəl sektorda fəaliyyət göstərən şəxslər üçün yaradılan imkanları göstərmək olar.
Ucqar kəndlərdə mövcud rabitə problemləri ilə bağlı da danışan nazir qeyd edib ki, hazırda təxminən 150 ucqar dağ kəndində telefonlaşmaya və sürətli internetlə təminata ehtiyac var. Onun sözlərinə görə, artıq bu istiqamətdə işlərə başlanılıb və bu ilin sonuna kimi ölkədə telefon və sürətli internetin olmadığı kənd qalmayacaq.
Mənbə: Milli.az
XƏBƏR LENTİ
- ŞƏRHLƏR