Birinci elegiya
Gözlərin qaradır deyə,
Haçansa qarışacaq gecəyə -
Qoşa damla kimi içəcək gözlərini gecə.
Dönəcəksən ay işığına,
Gizlədəcək səni
gecə , duman , çən ...
Hər səhər göz yaşlarını
Yığacağam çəmənlərdən,
çiçəklərdən.
1985.
Xatirə
Gəl
oynayaq
hazır saxlamışam
qartopunu da.
Bir yerdə atarıq
hara istəsən.
Bəlkə yox xəbərim,
sən atıb getmisən
mən gözləyirəm
hələ də
ovcumda ərimir
keçən ilki qar.
2001
Etüd
Dayanacaqdayam.
Qəfildən qoca bir ağac
ağır-ağır yaxınlaşdı mənə.
Palçıqlı ayaqlarıyla
dayandı yanımda.
Bahar adlı qatar
gələcək deyə , sevinirdi.
2002
***
Çox da bahardı ...
Ümidlər
qayıtmayan durnalardı.
Sənsizlikdən
gözlərim cadar – cadardı.
Eh , nə deyim , nə deyim –
Biri vardı ,
biri vardı ...
1997.
***
Gecə -
hisli qazan qapağı ,
Altında fikirlərim
Qoyulub dəmə.
Mən - gecənin aşpazı,
Söz bişirmək
düşüb öhdəmə.
1984
Bəxtiyar Əliyar
Azərbaycan Yazıçılar Birliyinin Üzvü
XƏBƏR LENTİ
- ŞƏRHLƏR