Vicdanın aynadakı şəkli
Bir gün üzümü tutdum qibləyə,
Eşidər Peyğəmbər səsimi deyə,
İçimdən ağladım onu çağırdım,
O həzrətlə sözü belə başladım:
"Ey Allahın dostu, Rəbbin həbibi.
Ey xəstə qəlblərin gözəl təbibi,
Səs ver səsimə ki, böyükdür dərdim,
Haqqı tapmaq üçün qapına gəldim.
Mənə bir yol göstər azmışam yaman,
Neyləyim verməyir nəfsim heç aman".
Ağlaya, ağlaya daldım xəyala,
Xəyallar apardı məni uzağa.
Canlandı qarşımda Peyğəmbər özü.
Elə bil eşidib dediyim sözü,
Gəlmişdi yanıma uca Peyğəmbər.
Sənin gəlişinə layiqəm məgər?
"Bismillah" söyləyib sözə başladı.
Amma danışarkən mənə baxmadı,
Dedi: "Haqqı nədən axtarırsan sən?
Məgər haqq gizlənib səndə görmürsən?
Günahlar bağlayıb sənin gözünü,
Eşitmir qulaqlar Haqqın sözünü
Nə üzlə çağırdın sən məni bura?
Vurub günahların qəlbimə yara".
Dedim: "Ya Peyğəmbər, bağışla məni
Hansı zalım istər incidə səni?
Mənə bir yol göstər, oyat qəlbimi
Açmışam mən sənə artıq dərdimi".
Dedi: "Günahlardan uzaq dur hər an
Zikr elə, namaz qıl, səhərlər oyan.
Şeytan heç vaxt yatmır silah əlində
Dua və namazla silahlan sən də.
Rəbbini unutma, yad et hər zaman
Günahlarla əldən getməsin həyan.
Çətinlik üz versə səbr et, darıxma,
Yolun yoxuşundan qətiyyən qorxma
Bu yolu yoldaşsız getmə heç zaman
Yolu yolçusu ilə tanıyır insan.
Yada sal Hüseynin (ə) kəsilən başın
Şəhadətə çatmış dostun, qardaşın.
O bir çıraq kimi hər zaman yanar,
Ancaq zatı qırıq o nuru danar".
Xəyaldan oyandım ətrafa baxdım
Elə bil mən birdən özümü tapdım
Ayağa qalxaraq məscidə getdim
Bütün günahlardan mən tövbə etdim.
Son dayanacaq
Yan baxma qardaşım, Fatihə oxu,
Bu qəbir sənin də son durağındır.
Burada tükənir qüvvətlə qorxu
Bu qəbir sənin də son dayanacağındır.
Diqqətlə bax hələ təzə bir məzar
Öləni üç gün olmuş daşında yazar.
Məzarcı yorulmaz qazar, ha qazar,
Bu qəbir sənin də son dayanacağındır.
Nə səs, nə səda, nə hirs, nə də bir əməl,
Üstündə bina yox, altında təməl.
Ey yolçu uzaqdan baxma bəri gəl,
Bu qəbir sənin də son dayanacağındır.
Nə olduq?
Hak yolundan azan olduq,
Nümayişə tapan olduq,
Ortalığa qoyan payı
Bölüşmədən alan olduq.
Tənbəl-tənbəl yatan olduq,
Bol kisədən atan olduq.
Pul üçün xarab malı
Sağlam deyə satan olduq.
Gizli sirri duyan olduq,
Yoxsulları soyan olduq.
İki ayaq çıxdı dördə
Zəhərli bir ilan olduq.
Sözü tutmaz yalan olduq,
İmtahanda qalan olduq.
Su görməyən çiçək kimi
Gün keçdikcə solan olduq.
Namus arı udan olduq,
Yuvanı çətin tutan olduq.
Şərəfli bir millət üçün
Bu zamanda utan olduq.
İrfan söylər duman olduq,
Yazdıq geri zaman olduq.
Əgər dönməz isək Hakka
Yemsiz sarı saman olduq.
XƏBƏR LENTİ
- ŞƏRHLƏR