26.05.2014-21:00

• Hekayələr

26 338

18

Osmanlı dövründə bir çarıqçı baba yaşayırmış. Bu baba çarıq düzəldərək gündək pulunu qazanan kasıb bir Allah dostuymuş. Söhbətini dinləyən xalq onu çox sevər, maddi olaraq da yardım edərmişlər. Günlərin birində çarıqçı baba yenə söhbət edərkən belə söyləyir:

- Allah izn verərsə, bir gün bu məhəllədə böyük bir məscid tikdirəcəyəm.

Xalqın içindən bir neçə nəfər buna inanmamış və belə söyləmişlər:

- Baba, sən çarıq düzəldərək çətinliklə keçinən bir qoca dərvişsən. Necə olacaq ki, üç-beş çarıq düzəltməklə məscid tikdirəcəksən?

- Övladım, "Allah izn verərsə" dedik axı. 

 O gecə çarıqçı baba hacət namazı qılaraq Allahu-Təalaya dua edir: "Rəbbim, mən xalqa məscid tikdirəcəyimi dedim. Sən izn versən, məni üzüqara etməzsən, mənə yardım edərsən". Hacət namazından sonra yuxuya gedən babaya yuxusunda belə deyilir: "Ey qulum, hazırlaş, yola çıx. Sənin üçün ruzi olaraq iki salxım üzüm ayırdım. Gedib ondan nəsiblən".

Çarıqçı baba yola hazırlaşır. Kasıb olduğu üçün evində quru çörəkdən başqa heç nə tapılmır və yol üçün bu quru çörəyi götürür və yola düşür. Bir az getdikdən sonra dincəlmək üçün bir qəhvəxananın yanında ağac altında oturur. Çörəyini çıxardıb yeməyə başlayır. Quru  çörəyini yeməyə çalışarkən qəhvəçi onu görüb yanına gəlir. 

- Baba, nə edirsən, xeyrdir inşaAllah?

- Övladım, yeməyimi yeyirəm - deyir baba.

- Bir az gözlə, bizim talvarda iki salxım üzüm qalıb, onu gətirim, sənin qismətinmiş, bari çörəyini isladarsan. 

Qəhvəçi üzümü gətirməyə gedəndə çarıqçı baba anladı ki, ruzisi gələcək. Qəhvəçi əlində üzümlə geri qayıtdıqdan sonra babadan soruşur ki, haradan gəlib, haraya gedir. Çarıqçı baba da yuxuda gördükləri üçün yola çıxdığını danışır. Bunları eşidən qəhvəçi əsəbi halda deyir:

- Baba, sən dəlisən? Bir yuxuya görə heç yola çıxarlar? Mən daim yuxu görürəm, hər yuxuya görə yola çıxmaqmı olar? Məsələn, mən tez-tez bir yuxu görürəm ki,  filan kənddə bir çarıqçı baba varmış. Onun qapısının yanından axan bir çeşmə və çeşmənin altında da iki küp qızıl var. Yəni indi mən bütün işlərimi atıb bir yuxuya görə yola düşüm? Baba, sən boş yerə yola çıxmısan - deyəndə çarıqçı baba hər şeyi anlayır. Evinə qayıdaraq qızılları tapıb məscid tikdirir". 

Əziz oxuyucular, Allahu Təalanın bizlər üçün necə bir yol çızdığını anlaya bilirsinizmi? Heç bir zaman önümüzdə hazır bir yol yoxdur. Öncə bizi imtahan edir, sonra qazandığımızı, təslim olduğumuzu görmək istəyir. Sonra yardımını göndərir. Necə ki, çarıqçı babaya qızılların yerini birbaşa göstərməkdənsə, o qədər yol gəzdirir. Həm təslimi göstərir, həm də mükafatını verir. Allahın sistemində iştiyak və liyaqat qanunu mütləqdir. Heç kim qarşılıqsız heç bir şeyə sahib ola bilməz. Rəbbimiz ilə olan münasibətlərimizi nəzərdən keçirmək lazımdır. Allahu Təala imanımızın həqiqi imana çevrilməsini istəyir. Bundan sonra da təvəkkülümüz artacaqdır. Anlamaq üçün arifə bir işarə yetər.

Amma bütün bunların başında qəlbi-dilək durur - həyatdaykən Yaradanına qovuşmaq, təslim olmaq diləyi, unutmayaq!

0 0

[lang=az]Şikayət et[/lang] [lang=en]Complain[/lang] [lang=ru]Пожаловаться[/lang] [lang=tr]Şikayetçi ol[/lang]

Lale_LR