Milli.Az xəbər verir ki, bunu İçərişəhər "Cümə" məscidi dini icmasının sədri, məscidin axundu hacıSurxay Məmmədli faciənin 26-cı ildönümü ilə bağlı bildirib.Onun sözlərinə görə, Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuş 1990-cı ilin 20 yanvar hadisələrinin 26-cı ildönümü ölkəmizin hər yerində olduğu kimi, o cümlədən də dini inanc yerlərimiz olan məscidlərimizdə də qeyd olunur. Belə dini mərkəzlərdən biri İçəri şəhər "Cümə" məscididir:
"Azərbaycan xalqının qürur ünvanına çevrilmiş 20 yanvar şəhidləri təkcə Azərbaycanın deyil, həm də İslam aləminin şəhidləri kimi tanınmalıdır. Həmin faciəli günlərdə öz ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladları canlarından keçərək şəhidlik zirvəsinə ucaldılar. Həmin faciədə şəhid olanlar müsəlman və İslam tarixinin ən böyük faciəsi olan Kərbəla faciəsinin sultanı İmam Hüseyn (ə.s) məktəbindən dərs almış qəhrəmanlar idilər".Hacı Surxay Məmmədli İçərişəhər "Cümə" məscidi dini icması adından Azərbaycan xalqına şəhid ailələrinə və dünya müsəlmanlarına 20 yanvar faciəsinin il dönümü ilə əlaqədar olaraq başsağlığı verib və bütün şəhidlərimizə Allahdan rəhmət, ailələrinə səbr diləyib: "20 yanvar faciəsinin ildönümü ilə əlaqədar icma üzvləri və digər mömin qardaşlarımız şəhidlərimizin əziz ruhlarına ehtiram olaraq Şəhidlər Xiyabanını ziyarət edəcək və "Cümə" məscidində ehsan süfrəsi təşkil olunacaq. Allah bütün şəhidlərimizə rəhmət eləsin".
Mənbə: Milli.Az
XƏBƏR LENTİ
