Ölkədə yumurta istehsalının artması qiymətin azalmasına səbəb olur
Ötən il ölkədə 1 milyard 562 milyon 700 min ədəd yumurta istehsal olunub və bu 2013-cü ilin göstəricisindən 161 milyon 300 min ədəd və ya 11,5% çoxdur. Bu isə təbii ki, yumurtanın qiymətinə təsir edən, yəni aşağı salan amildir. Artım da adıçəkilən yeyinti məhsulunun qiymətinin enməsinə səbəb olub. Ötən ilin müvafiq dövrü ilə müqayisədə 1 ədəd yumurtanın qiymətində fərq 5-6 qəpik təşkil edir. Bu fərqin səbəblərini Kəpəz TV-nin (Region TV) əməkdaşı Gülnar Fazilqızı araşdırıb.
2011-ci ildə yumurtanın qiymətində baş verən astronomik artım çoxlarının yadındadır. Səbəb kimi, ev quşlarının kütləvi tələf olması göstərilir, yumurtanın qiyməti 20-25 qəpik arasında dəyişirdi. Hər halda indi bazar iqtisadiyyatı dövrüdür və qiymətlər bu və ya digər səbəblərdən asılı olaraq tənzimlənir. Əgər belə olmasa idi, 2011-ci ildə "ceyran belinə" qalxan yumurta qiymətləri indi belə münasib olmazdı.
Kənd Təsərrüfatı Nazirliyinin verdiyi məlumata görə, Azərbaycanda son 1 ayda yumurtanın qiyməti 57 faiz ucuzlaşıb. Yəni bir ay əvvəl yumurtanın 1 ədədi 11 qəpiyə satılırdısa, indi qiymət orta hesabla 7 qəpiyə düşüb. Hətta bəzi hallarda bazar və yarmarkalarda yumurtanın bir ədədi 5 qəpiyə də təklif olunub. Qiymətlərin ötən ilə nisbətən aşağı olmasına səbəb isə ölkədə yumurta istehsalının artmasıdır.
Mahir Hacıyev - Ümumdünya Quşçuluq Assosiasiyasının Azərbaycan bölməsinin sədri: “Bu gün Azərbaycanda quşçuluq sənayesi olduqca dinamik və intensiv inkişaf edir. Quşçuluq sənayesinin inkişafı dövlət proqramının meyarlarından olan bir səviyyədə, yəni yüksək səviyyədə yerinə yetirilib. Hazırda 2014-cü ilin sonuna qədər olan məlumatlara əsasən, Azərbaycan 95,7 faiz öz yumurtaya olan tələbatını ödəyir”.
Yumurtanın ucuzlaşması əsasən fevral ayının əvvəlindən müşahidə olunur. Azərbaycan əhalinin yumurtaya olan tələbatını daxili istehsal hesabına ödəmək gücündə olduğu üçün dolların artması bu qida məhsulun qiymətinə təsir etməz deyə düşünürdük, amma son iki gündə apardığımız müşahidə cüzi də olsa, qiymət fərqinin yarandığını göstərdi.
Mahir Hacıyev: “Azərbaycanda damazlıq təsərrüfatlarının olmaması səbəbindən, düzdür, damazlıq təsərrüfatları var, amma final hibridlə işləyirlər, yəni, yerli, özümüzün elmi əsaslarla təşkil olunmuş damazlıq təsərrüfatı yoxdur və əksər təsərüfatlar yumurtalıq krosları xaricdən gətirirlər. Ümumiyyətlə yem əlavələri, yemlərin bir neçə komponentləri xaricdən gəlir”.
İstənilən halda ucuzlaşma bu məhsulun əhaliyə maya dəyərindən aşağı qiymətə satılmasına səbəb olur. Bir müddət əvvəl yumurtanın topdansatış qiyməti 1 ədəd üçün 9 qəpik idisə, hazırda bu qiymət 5-6 qəpik təşkil edir. Ümumilikdə Azərbaycanda 50-yə yaxın quşçuluq təsərrüfatı var.
Mənbə: Milli.Az
XƏBƏR LENTİ
- ŞƏRHLƏR