Marketlərdə saxta düyülərin satılması ilə bağlı xəbərlər yayılıb. Məlum olub ki, belə düyülərin əksəriyyəti təbii yolla yetişdirilmir. Biz də bazarımıza bu məhsulların hansı ölkələrdən gətirildiyini və qiymətini öyrənmək üçün bir neçə marketə baş çəkdik.
Araşdırmamız zamanı bəlli oldu ki, satışda yerli düyülərlə yanaşı, Pakistanda, Hindistanda, Rusiyada və İranda istehsal olunan düyülər satılır. Qiymətlərə gəlincə isə “Tamaşa” düyüsünün 1900 qramlığı 4 manat 39 qəpik, “King risa” 3 manat 59 qəpik, “Muhabbet” düyüsü 4 manat 10 qəpik, “Mümtaz” 4 manat 63 qəpik, “Şahənşah” düyüsü 4 manat 12 qəpiyə idi.
Satıcı Afaq Əliyevanın sözlərinə görə, əhali daha çox yerli düyülərə üstünlük verir. Ancaq Hindistandan gətirilmə düyülərin də alıcılarının az olmadığını deyən satıcı düyülərin saxta olmağı ilə bağlı söhbətləri eşitmədiyini bildirdi: “Ən çox Hindistan düyüsü alınır. Mağazamızda ən bahalı düyü də elə Hindistanındır. Ən ucuz düyü isə yerli düyülərdir”.
Alıcılar isə düyülərin qiymətində cüzi də olsa, artım olmasından gileylənirdilər. Alıcı Şəlalə xanım deyir ki, o həmişə “Tamaşa” düyüsündən istifadə edir, dadından da razıdır: “Adətən yerli düyülər alıram. Bayram qabağı qiymətləri artıracaqlar deyə indidən lazımi ərzaqları alıram”.
Alıcı Şəfa Baxşəliyeva isə Hindistan düyülərinin daha dadlı olduğunu söylədi: “Mən həmişə plovları Hindistan düyüləri ilə bişirirəm. Yerli düyülərdən də istifadə edirəm”.
Kənd təsərrüfatı mütəxəssisi Vahid Məhərrəmov isə qəzetimizə açıqlamasında saxta düyülərin necə əldə edildiyi haqda danışdı: “Saxta düyü əldə etmək üçün digər dənli bitkilərin (qarğıdalı) dəni üyüdülür və sonradan ekstruderlə düyü formasına salınır. Bu yolla əldə edilən düyü orqanizm üçün ziyanlı deyil. Sadəcə olaraq, bəzi orqanizmlər üçün allergik ola bilər”.
Azad İstehlakçılar Birliyinin sədri Eyyub Hüseynov bəzi düyülərin genetik modifikasiya olunmuş (GMO) düyülər olduğunun təsdiq edilmiş bir məsələ olduğunu söylədi: “Sarı və qızılı düyülərin genetik modifikasiya olunması birmənalı şəkildə təsdiq edilmiş bir məsələdir. Xüsusən də Pakistandan gətirilən qızılı düyülər GMO məhsuludur. Bu düyülər insan həyatı üçün təhlükəlidir və gələcəyi məlum olmayan nəticələrə gətirib çıxara bilər. Qanunda var ki, bu tip düyülər ölkəmizə buraxılmamalıdır. Dövlət orqanları bu istiqamətdə iş aparmalıdır. İstehlakçı hüquqlarını qoruyan qanunlar kompleksi, bunu yerinə yetirən dövlət orqanlarının fəaliyyəti həddindən artıq zəifdir. Ona görə də ölkə bazarlarında bu cür təhlükəli mallar çoxdur”.
XƏBƏR LENTİ
- ŞƏRHLƏR