Bu kosmik olay Sakit okeanda və ətraf ərazilərdə, Havay adalarından təxminən 2000 km cənub-şərqdə müşahidə olunacaq. Tutulma qismən Kanada və ABŞ-ın şərqində, Cənubi Amerikada, Yeni Zelandiyada, Avstraliyanın qərb sahillərində, həmçinin Yaponiyada da görünəcək. Dünya xəritəsində həmin trayektoriyanı gözlərimiz önündə canlandırsaq, həmçinin hadisənin günorta saatlarına düşməsini nəzərə alsaq, görərik ki, tutulma Azərbaycan ərazisində müşahidə olunmayacaq.
İlk öncə bildirək ki, tutulma məqamında Ay Qoç bürcündə olacaq. Belə hallarda insanlar aktivləşir, hətta aqressivləşirlər. Bədirlənmiş Ay Qoç bürcünə girəndə bu aqressivlik kəskinləşir. İnsanların beyni sanki "tormozlanır" və onlar əsəbi olurlar. Belə halda əsəbiləşməmək və eqoizmdən uzaq olmaq məsləhətdir. Bu dövrdə öz işlərinizi tez bir zamanda qaydasına salın. Ay Qoç bürücündə olanda sənaye, texnika, dəmir metalı, od, mexanizm və alətlərlə məşğul olmaq məsləhətdir. Bu dövrdə çalışın rəhbərlik ilə ünsiyyətdə olun, özünüzə qiymətli əşyalar və müxtəlif avadanlıqlar alın. Uzun və çətin işləri təxirə salın. Bu zaman kəsiyində nigah bağlamaq, bir işə kapital qoymaq və müxtəlif müqavilələr bağlamaq məsləhət deyil.
Bu müddətdə başın və baş beynin həssaslığı artır. Çox adamlar bu gündə baş ağrısından əziyyət çəkir, gözlərinin tez yorulmasından şikayət edirlər. Buna görə də Ayın Qoç bürcündə olduğu günlərdə harasa baxmaq tələb olunan, görməni yoran işlərdən qaçmaq, televizor və kompüter yanında keçirilən vaxtı ixtisara salmaq yaxşı olardı. Kosmetik əməliyyatların aparılması - sızanaqların, qırışların, çillərin, ziyillərin kəsilməsi və s. təhlükəlidir. Ay Qoç bürcündə olanda stomatoloji kabinetlərə (xüsusilə də əgər söhbət yuxarı dişlərdən gedirsə) getmək lazım deyil.
Avesta təqviminə görə, tutulma Tərəzək (17 sentyabr-16 oktyabr) ayına düşür. Payızın gəlişinə təsadüf edən bu aralıqda insanların qarşılıqlı davranışlarında sabitlik olur. Göstərilən vaxtda ədalət və tarazlıq yaranır, hər kəs günahlardan qorunmağa və tövbə etməyə həvəs göstərir.
Avesta astrologiyasında isə (Günəş təqvimi) oktyabrın 8-i 22-ci Günəş gününə düşür. Haçansa unutduğunuz köhnə işin bərpası olmayacaqsa, bu gün yeni işə başlamayın. Həyatda bir çox şeylər öncədən qurduğunuz plan üzrə dəyişir. Kəskin dəyişikliklər, zamana və məkana uyğun hərəkət etmək günüdür. Səhər evdən çıxanda küləyin hansı istiqamətə əsdiyinə fikir verin. Əgər arxadan əsirsə, hərəkətinizə davam edin, üzünüzə vursa, ayaq saxlayıb fikirləşin. Bəlkə qərar verdiyiniz işə başlamaq hələ tezdir və ya qarşıda sizi böyük maneələr gözləyir?! Kişilər üçün küləyin sağ tərəfdən, qadınlar üçünsə sol tərəfdən əsməsi işinizə kömək və dəstək əlamətidir.
Küləklə, səma amilləri ilə bağlı olan hər bir şey bu gün böyük əhəmiyyət kəsb edə bilər. Buludlara, onların quruluşuna göz qoyun. Küləyin papağınızı yerə salması müdafiənizin zəifləməsi deməkdir.
Ümumiyyətlə, əlinizdəkini buraxsanız, onu itirəcəksiniz. Tavandan nəyinsə qopub düşməsi və ya damınızın başınıza uçması da pis əlamətdir: əmlakınız və var-dövlətiniz əlinizdən çıxa bilər. Bu gün gözlənilməz hadisələrlə, yeni tanışlıqlarla zəngindir. Buna getmək, insanlarla ünsiyyətdə olmaq, baş verənləri ürəyinizə salmamaq və tez unutmaq məsləhət görülür.
Avesta astrologiyasına görə, 22-ci Günəş gününün himayədarı Vatadır (Mənası: Külək).
Veda astrologiyasında tutulma zamanları insanlara aşağıdakılar tövsiyə olunur:
- tutulmaya tamaşa etməyin;
- tutulma saatlarında qapalı şəraitdə olun;
- uzaq səfərə və ya səyahətə çıxmayın;
- tutulmadan 3 saat əvvəl və sonra qida qəbul etməyin;
- sükan arxasında oturmayın, yaxud çox ehtiyatlı olun;
- maliyyə əməliyyatlarından qaçın;
- kütlə ilə hər hansı əlaqə yaratmayın;
- zikr edin, ruhani aləmə qapılın, ya da heç olmasa, dincəlin;
- pis vərdişlərdən qurtulun, çünki tutulma zamanı orqanizm buna daha tez gedir (məsələn, siqareti tərgitmək istiqamətində və s.)
Beləliklə, verdiyimiz bu göstəriciləri analiz edib tutulma vaxtında hansı addımlar atacağınızı təyin edə bilərsiniz. Bizim məramımız hər kəsə doğru olanı göstərmək, zülmətdən xilas yollarını başa salmaq və Tanrıya yaxın olmalarına xidmət göstərməkdir. Gəlin, yarıyolda qalmayaq, çünki yolumuz Ağ İşığadır. Bu İşıqda isə nə Ay, nə də Günəş tutulması bizə mane ola bilməz.
Yolumuz nurlu olsun! Amin!
XƏBƏR LENTİ
- ŞƏRHLƏR