Təhsil Nazirliyi yalnız attestatla tələbə qəbul edən Ukrayna və Rusiyadakı ali məktəblərdə təhsil almış Azərbaycan vətəndaşlarının ali təhsil haqqında sənədlərinin tanınması məsələsinə aydınlıq gətirib.
Təhsil Nazirliyindən Lent.az-a verilən məlumata görə, əgər tələbə təhsil aldığı ölkənin qanunları çərçivəsində ali məktəbə qəbul olunubsa və ali təhsil müəssisəsi həmin ölkə tərəfindən tanınırsa, o zaman müraciət edən şəxsin ali təhsil haqda sənədləri müvafiq qaydada nostrifikasiya prosedurları keçdikdən sonra ölkə ərazisində tanınacaq.
Qeyd edək ki, Ukrayna və Rusiyada bir sıra ali yalnız attestatla tələbə qəbul edir. Son vaxtlar Azərbaycanda Rusiya və Ukraynanın belə ali məktəblərinə tələbə göndərmək adı ilə şirkət və firmalar tərəfindən müxtəlif elanlar verilir. Təhsil Nazirliyi isə bəyan edir ki, xarici ölkələrə tələbə qəbulunu həyata keçirən şirkətlər nazirlikdə akkreditasiyadan keçmirlər. Bu tip şirkətlərin Təhsil Nazirliyinin adından istifadə etmələri onların qanun qarşısında məsuliyyətini yaradır və nazirlik bu halda müvafiq dövlət orqanları qarşısında məsələ qaldırmaq hüququna malikdir.
Xatırladaq ki, Tələbə Qəbulu üzrə Dövlət Komissiyasının sədri Məleykə Abbaszadə abituriyentləri və valideynləri yalnız attestatla qəbulun aparıldığı Ukrayna və Rusiya ali məktəblərinə üz tutmamağa çağırıb. Məleykə Abbaszadə bildirib ki, müxtəlif ixtisas qrupları üzrə balların aşağı salınmasının bir səbəbi də xarici ölkələrdəki belə ali məktəblərə gənclərimizin axınının qarşısını almaqla bağlıdır.
Mənbə: Lent.az
XƏBƏR LENTİ
