18.10.2011-01:10

• Düşüncə dərsi

65 004

65

Əgər məsləhətlər təsir etmirsə...

Valideynlərimizin yaşadıqları zamanla bizim zaman arasındakı fərqə baxdıqda bu günümüzdə öz yarımızla tanış olmaq daha asandır. İlk əvvəl İnterneti yada salmaq istərdim: müxtəlif tanışlıq saytları, forumlar, çatlar, sosial şəbəkələr və s. - bütün bunlar yeni tanışlıqlar üçün əla vasitələrdir.

Lakin hər zaman belə bir sual meydana çıxır: "Necə edək ki, tanış olduğumuz insan üçün hər zaman aktual olaq və marağımızı itirməyək?". Buna aid bir çox məqalələr, kitablar mövcud olsa da, bütün təlimatları yerinə yetirsək də, ünsiyyət alınmır və müəyyən ənənəvi söhbətlərdən sonra dialoq davam etmir.

Əslində səbəblər müxtəlif ola bilər. Tez-tez öz davranışlarımızı analiz etsək də, əsl səbəbləri görmürük. Məsələn, elə qızlar var ki, artıq çəkilərini və dərilərinin pis olmasını əsas gətirərək tanışlığın çətin olduğunu deyirlər. Amma əsl səbəb onların utancaq olmasıdır və bununla onlar kişiləri özlərindən uzaqlaşdırırlar.

Tanışlıqla bağlı bir çox məsləhətlər yalnız texniki hissəyə yönəlmişdir. Yəni xarici görkəmlə bağlı məsləhətlər, hara getmək və getməmək, əks cinsin nümayəndəsi ilə ilk ünsiyyət və s. Lakin təəssüflər olsun ki, belə məqalələrin müəllifləri daxili aləmə çox az yer ayırırlar. Hər dəfə hamısı yalnız bir şey təsdiq edir: "Özünüzə inanın! Siz hamıdan gözəl və cəlbedicisiniz!" Lakin xarici görkəm deyil, məhz psixoloji və emosional halımız əsas sayılır.

Görəsən, bizə ətrafdakılarla tanış olmaqda mane olan nədir? Ola bilsin ki, bizim yazımız kim üçünsə açıqlama olmayacaq, amma bəzi insanlar bu yazıdan sonra nələrisə düşünə bilərlər və özlərində dəyişikliklər edərlər.

Səbəb №1. Özünə inamsızlıq

Bu, tanışlıq zamanı ən məşhur səbəblərdəndir. Hansısa mənada bu inamsızlıqda məşhur jurnalların təsiri də vardır. Həmin jurnallarda əks olunan qadınlar elə təsvir edilir ki, elə bil həmin qadınlarda sellülit, qırış və pis əhval-ruhiyyə olmur.  

Əlbəttə ki, kişini maraqlandırmaq üçün xarici görkəm vacibdir, lakin ideal olmaq heç də məcburi deyil. Sözsüz ki, qadın özünə baxmalıdır, bədən quruluşunu, saç düzümünü formada saxlamalıdır, lakin parlaq gözlər və baxış tanışlıq üçün daha vacibdir.

Məhz özünə inamsızlıq zamanı parlaq gözlər yoxa çıxır. Bu inamsızlıq yerişdə, jestlərdə, baxışda, intonasiyada duyulur. Əgər düşünürsünuzsə, kişilər bunu hiss etmir - yanılırsınız.

Hiss edirlər, özü də necə! Onarın dediyinə görə, inamsızlıq uzaqdan hiss edilir və hətta belə xanımlar kişilərlə öz aralarında bir "sədd" də tikirlər. Onlara çatmaq qeyri-mümkündür, onlar elə təəssürat yaradırlar ki, həmsöhbətinə layiq deyillər və beləcə, dialoq alınmır. Bəzən özünəinamsızlıq o dərəcəyə çatır ki, həmin şəxs ətrafdakılardan asılı vəziyyətə düşür və öz fikirlərini təsdiqləyən insana ehtiyac duyurlar. Belə halda başqa insanlarla ünsiyyət qurmaq stresə çevrilir və qarşı tərəfdən rədd cavabı almaq həmin insana psixi təsir edir.

Burada siz bir şeyi başa düşməlisiniz - SİZ ŞƏXSİYYƏTSİNİZ, özünüz üçün ətrafdakılardan asılı olmayaraq çox dəyərlisiniz. Və kimsə sizinlə ünsiyyəti davam etmək istəmirsə, demək, problem sizdə deyil, ondadir.

Özünə güvənmək haqqında məsləhətlər saysız-hesabsızdır. O məsləhətlərin çoxu əlbəttə ki, doğrudur, lakin bəzən inamsızlığın kökü o qədər dərin ola bilər ki, psixoloq köməyindən istifadə etmək lazım gələr. Həkimə müraciət etməkdən əsla çəkinməyin. Başa düşün ki, o da adi terapevt və okulist kimi həkimdir.

Səbəb №2. Münasibətlərə psixoloji cəhətdən hazır olmamaq

Əgər siz çoxdan kiminləsə tanış olmaq istəyirsinizsə, onda bir daha düşünün - sizə bu münasibətlər həqiqətənmi indi lazımdır? Bəlkə siz yalnız xoş olmaq üçün özünüzə yar axtarırsınız?

Yox-yox, heç kim sizi tənha qalmağa çağırmır. Həmçinin, heç kim demir ki, tək olmaq yaxşıdır. Lakin öz istəyimizdəki əsl tələbi tapmaq və bilmək vacibdir. Özünüzlə dürüst olmağa çalışın. Bəlkə aydın olacaq ki, siz hələ öz həyatınıza kişi buraxmağa hazır deyilsiniz.

Bəlkə də sizin əvvəllər münasibətlərinizdə neqativ təcrübələr olub və siz yeni münasibətlər qurmaqdan qorxursunuz? Qorxursunuz ki yenə sizi incidə bilərlər? Siz ola bilər düşünürsünüz ki, qəlbinizi qıran şəxsi bağışlamısınız, lakin, qəlbinizin dərinliyində bu problem hələ də qalmaqdadır. Buna görə də ünsiyyət və tanışlıq zamanı məsafə gözləyirsiniz və bu münasibətləri elə sadə tanışlıq müstəvisində də saxlayırsınız.
Siz öz üzərinizdə çalışmalısınız ki, insanlara inanasınız və onları başa düşməlisiniz, heç də hər bir münasibətin sonu kədərlə bitmir.

(ardı var...)

BƏS SİZ NECƏ, YENİ TANIŞLIQLARDAN QORXURSUNUZMU? ÜNSİYYƏTCİLSİNİZMİ?

0 0

[lang=az]Şikayət et[/lang] [lang=en]Complain[/lang] [lang=ru]Пожаловаться[/lang] [lang=tr]Şikayetçi ol[/lang]

vefa-n