Narı qiymətli hesab olunan "yaqut daşlı hökmdar" və "ilk yardım həkimi" adlandırırlar. Qədd-qamətli, çox yaraşıqlı və üstəgəl min bir dərdin əlacı hesab olunan bu sehrli giləmeyvə hələ qədim zamanlardan gözəllik və bərəkət rəmzi sayılıb. Daima həyat simvolu hesab olunan bu odlu-alovlu nemət xarici görkəminə görə də digər meyvələrdən yüksəkdə dayanır və seçilir.
Deyirlər ki, bütün meyvələr orqanizmə daxil olanda ürəyə baş əyirlər, narı isə ürək özü sevinclə qəbul edib ona boyun əyir. Bir çox əfsanələrdə və mifologiyalarda özünəməxsus yer tutan nar giləmeyvəsini qadın gözəlliyinə bənzədirlər. Bu dadlı və faydalı təamı nəinki meyvələrin şahı, onu hətta ruhu möhkəmləndirən möcüzəli nemət kimi görürlər.
Çində "həyat ağacı" sayılan narın şirin dənələrindən toy zamanı yeyib yeni ailə quranlara hal-hazırda da xeyir dua verirlər. Yunanıstanda nar ər arvadın sadiqliyinin simvolu olub. Qədim Misirdə isə vəfat edənləri nar giləmeyvəsi ilə dəfn edərlərmiş, bu onların qayıtması ümidini simvolizə edərdi.
Çoxsaylı dənələri ilə bu "taclı" nemətə uzun müddət məhsuldarlıq, bolluq və daimi həyat kimi qiymət verilib.
Azərbaycan əfsanələrində nar sevgi və ehtiras simvolu kimi təqdim olunub. O zamanlar sevgini bildirmək nəzakətli hesab olunmurdu, gənclər qızlara nar gətirməklə öz hisslərini bildirir və sevgilərini təklif edərdilər.
Qüvvətli cavanlıq eliksiri.
Müalicəvi xüsusiyyətlərə malik bu vitamin"bombası" cavanlıq mənbəyi sayılır. Əminliklə söyləyə bilərəm ki, xroniki yorğunluq, başgicəllənmə, əzələ ağrılarının səbəbi orqanizmdə hemoqlabinin azlığıdır, məhz bu mədə hüceyrə toxumalarını oksigenlə təmin edir. Orqanizmdə dəmir çatışmayanda da qanın miqdarı aşağı düşür. Bu kimi problemləri ortadan götürmək üçün rasionumuza nar giləmeyvəsini daxil etmək yetərlidir.
Vitamin deposu sayılan nar tərkibində saysız-hesabsız faydalı və xeyirli maddələr toplayıb:vitamin A, C, B1, B2, dəmir, kalsium, kalium, yod, fosfor, karbohidrat, protein. Antioksidantlarla zəngin bu "super" meyvə insan orqanizminə enerji verir, immunitet sistemini gücləndirir, infeksiyalara qarşı müqaviməti qoruyur və artırır.
Yüksək potensiala malik olan nar qocalma prosesini ləngidir, qan təzyiqini müsbət bir şəkildə nəzarətdə saxlayır.
XƏBƏR LENTİ
- ŞƏRHLƏR