İtalyalı Kiyaranın cəmi 25 yaşı var, lakin blogger kimi çox məşhur xanımdır. Bloqunda təkcə geyimlərdən və modadan danışmır, eyni zamanda sevgidən, daha doğrusu, öz sevdiyi şəxsdən və səyahətlərindən danışır. Səyahət etdiyi ölkələr haqqında maraqlı məlumatlar təqdim edir. O, "The blonde salade'' adlı bloqunu 2009-cu ildə, yəni 21 yaşında açıb. Cəmi bir il sonra blogger kimi çox məhşur xanımlardan biri olub. Bu məşhurluğun səbəblərindən biri kimi internet şəbəkələrindəki şəxsi səhifələrində dostlarının çox olması göstərilir. Bloqunu açdığı gündən həmin səhifələrində dostlarına təqdim edərək istifadəçi sayını artırmışdır. Milanda xarici əlaqələr üzrə təhsil alır. Lakin bloquna və geyimlərinə ayırdığı qədər təhsilinə zaman və diqqət ayırmır. Kiara bildirir ki, təhsil hər zaman lazımdır. Lakin uşaqlıqdan moda dünyası və moda tarixi ilə maraqlanmış və bu sahə onun üçün cəlbedici olmuşdur.
Sevdiyi şəxsin adı Riçidir. Onlar 2006-cı ildən görüşməyə başlayıblar. Riçi ona hər zaman kömək olur. Gördüyünüz bu fotoların əksəriyyətini Riçi çəkir və bloqa yerləşdirir. Bloqda eyni zamanda kiçik bacıları Françeska və Valentinadan söhbət açır. Bəzən bloqda Kiaraya bütün geyimlərin şəxsən onun qarderobuna aid olub-olmadığını soruşurlar. O isə əksər geyimin şəxsən ona aid olduğunu, bəzən ayaqqabı və ya çantasını bacılarından, anasından və ya nənəsindən götürdüyünü deyir. Kiaranın qarderobunda çantalar xüsusi yer tutur. Aksesuar və çantalarını model işləməklə qazandığı pulla və ya tələbə təqaüdü ilə alır. Eyni zamanda bloqundan da gəlir əldə edir. Bununla yanaşı, bəzi brend mağazalar məhşur blogger olduğu üçün ona əlavə endirimlər və güzəştlər də edirlər. Çanta və geyimlərindən bəzilərini isə Riçi hədiyyə edib.
Kiaranın sevdiyi şəhərlər Nyu-York, London, Çikaqo və Parisdir. Sevdiyi yemək tort və pizzadır. Sevdiyi film “Forrest Qamp” adlanır. "Vogue" Türkiyə brendi 2010–cu ildə bir həftə ərzində hər gün Kiaranın bir obrazını dərc edib. Kiara bundan çox sevindiyini və fərəh hissi duyduğunu bloqunda qeyd edib. Onun fikrinə görə, üzük, qolbaq, dırnaq boyası istənilən günlük obrazı tamamlaya bilər.
Kiara öz itini çox sevir və demək olar ki, bir çox şəkildə onun da iştirak etdiyini görə bilərik. Bundan əlavə onu da qeyd edim ki, Kiaranın itini "Chanel" brendindən olan çantada daşıması hər kəsdə təbəssüm yaradır.
XƏBƏR LENTİ
- ŞƏRHLƏR