Ötən gün Hədəf STEAM liseyində Gənclər Günü münasibətilə "Elmin ekologiyası" adlı elmi-kütləvi təlim keçirildi.
Qadin.Net xəbər verir ki, elmsevərlər təlimdən əvvəl liseydə fəaliyət göstərən İnteraktiv Elm Muzeyinin rəhbəri Elçin Abbasovla görüşdülər. Bu görüşdə Elçin bəy bir-birindən maraqlı təcrübələrini əyani şəkildə nümayiş etdirdi. Gənc elmsevərlərlə göstərdiyi təcrübələrin işləmə mexanizmini müzakirə etdi.
Üç saat davam edən "Elmin ekologiyası" əvvəl Nurlan Suvarovun, daha sonra gənc ekoloq Minayə Ələkbərlinin seminarları əsasında davam etdi.
Nurlan Suvarov “Nikola Teslanın ən maraqlı təcrübələri” adlı təlimində Teslanın 700 dən çox patentlərindən və onun çətin həyat yolundan bəhs etdi. Teslasevərlər təlimin sonunda Nurlan Suvarova öz suallarını ünvanladılar.
Gənc ekoloq Minayə Ələkbərli isə “Ekologiyada ixtiraçıların izi” mövzusunda təlim keçdi. O, plastik qabların zərərindən, onların təkrar emalından və bu emalın insanlara faydasından danışdı. Onun sayəsində elmsevərlər ekologiyanın çirklənməsinə qarşı icad edilmiş fərqli ixtiralardan və ixtiraçılardan danışdı.
Onu da qeyd edək ki, Qadin.Net saytının baş redaktoru, yazıçı Xəyalə Murad təlimdən sonra Minayə Ələkbərli ilə görüşüb, onun çıxışını yüksək dəyərləndirdiyini bildirdi. Aydın oldu ki, Minayə Ələkbərli təkcə çıxışı ilə yox, həm də əməlləri ilə insanları aydınladır. Belə ki, xanım ekoloq Sağlam Düşüncə Gənclər Təşkilatında fəaliyət göstərdiyindən, Sumqayıt şəhər məktəblərində şagirdlərlə görüşdüyündən, onlara plastik qabların təkrar emalından, iqlim dəyişikliyinin azalmasına kömək etməyin yollarından, atmosferdəki istixana qazlarının zərərini azaltmağın yollarından, torpağı batareyaların tərkibindəki ağır metalların zərərindən qorumağın yollarından və ümumilikdə, ətraf mühitin gələcək nəsillər üçün daha yaxşı olmasını təmin etməkdən ötrü təlimlər keçdiklərini deyir: "Məqsədimiz sağlam qida və yaşadığımız ətraf mühit haqqında hər şeyi, eyni zamanda tullantılardan istifadəni birgə öyrənmək və öyrətməkdir!"
Təlimin sonunda Hədəf Nəşriyyatının icraçı direktoru Səbuhi Şahmursoy təlimçilərə və elmsevərlərə təşəkkürünü bildirərək gələcəkdəki işlərində uğurlar dilədi.
Sonda xatirə şəkli çəkildi.
XƏBƏR LENTİ
- ŞƏRHLƏR