Qar ələndi saçlarıma.
Qəbrin üstdə çökdü dizim.
Daş asıldı qıçlarıma,
Zülmət oldu ağlar gözüm.
***
Yuxu sandım, inanmadım
"Hanı anam?"- hey soruşdum.
Qəsdən qalxıb, oyanmadım.
Yastıq üstdə halsız düşdüm.
***
Öz əlinlə düzəltmişdin.
Hərarətin duyulurdu.
Mənim üçün gizlətmişdin.
Qəlb yanırdı, göz soyurdu.
***
Nə az imiş göz yaşları.
İnsan necə toxtayarmış.
Qucaqlayıb boz daşları.
Xəyallarda axtararmış.
***
Axtararam gizli-gizli
Bacılarda nişanələr.
Biri sən tək ala gözlü.
Biri sən tək şirin, gülər.
***
Hərəsi bir təsəllidir
Elə bil ki, rəssammışsan.
Xəyal dolu dünyamıza
Neçə naxış calamısan?
***
Qardaş verdin, payın şirin.
Tək deyiləm bu dünyada.
Anlamıram, nəymiş sirrin.
Çatmadıq bu murada.
***
Təzə daddın nübarını.
"Nəvə" adlı var-dövlətin.
Əllərinin qabarını
Sandın rəmzi səadətin.
***
Yola saldın payız günü
Payız günü qayıdıram.
Unutmaram öyüdünü.
Dedin "Sənə inanıram".
***
Qayıdıram nəfəsini
Ocağından almaq üçün.
Əziz, şirin, şən səsinin
Sədaçısı olmaq üçün.
18.09.2011, Brest.
XƏBƏR LENTİ
- ŞƏRHLƏR