Bəzən o qədər sevincli oluram ki, bu dünyaya sadəcə imtahan üçün gəldiyimi unuduram. Amma bir şey ağlımdan heç vaxt çıxmır, o da Allahı nə qədər çox sevdiyim.
Mənə göz verib- Sevdiyim insanları, payızda tökülən yarpaqları, qışda yağan qarı, günəşin gözümə düşdüyü zaman gözümün qamaşmasını, axşamlar buludların arasından çıxan ayı, yazda açan çiçəkləri və s. görə bilməyim üçün.
Mənə qulaq verib - Sevdiyim insanların məni sevdiklərini dediyini eşitməyim, anamın, atamın, bacımın, qardaşımın səsini eşitməyim üçün.
Mənə dil verib - Ürəyimdən keçən insana, yaxınlarıma sevdiyimi deməyim, birinin qəlbini qırdığım zaman könlünü almağım üçün.
Mənə əl-ayaq verib - Heç kimi narahat etmədən, özüm istədiyim yerə gedə bilməyim üçün, yolda köməyə möhtac olan bir qocaya əlindəki çantaları aparmağa kömək eləmək üçün.
Mənə ağıl verib - Yaxşıların yaxşılıqlarını itirməməyim, pislərin pisliklərindən Allaha pənah gətirməyim üçün.
İndi düşünürəm ki, mən çox zənginəmmiş ki, Allahım mənə bu xoşbəxtlikləri yaşamağı nəsib edib.Çox yox, beş dəqiqəlik düşünək ki, gözümüz görmür. Necə olarıq, şəxsən mənim ürəyim dayanar bəlkə də, ya da kimsə nəsə deyir eşitmirəm, ya da ürəyimdən keçən sözü deyə bilmirəm, ya da dostlarım gəzməyə getdiyi zaman yeriyə bilmədiyim üçün onlarla gedə bilməyib, evdə sadəcə onlara pəncərədən əl etməklə kifayətlənirəm.
İtirdiyi 5-10 manat pulu haqda oturub qara-qara düşünən insanı görürəm... Niyə? Özümə sual verirəm. Məgər bu o qədər vacibdir? Bəlkə də həmin insanın pulunu itirməsilə Allah onu sınamaq istəyir, ya da onun itirdiyi pul kiminsə axşam yeməyinə ruzi alması üçün qəsdən itib. Nə bilmək olar. Özünün itirdiyi zamanı, axirətini, günahlarını necə yumaq barədə düşünməkdənsə, xırda boş şeylərə görə fikir eləyir.Yaşadığımız hər bir gün hər an Allahın sınağı ilə üzbəüz dayana bilərik. Çalışmaq lazımdır ki, sınaqdan üzüağ çıxaq. Düşünüb hərəkət edək.Təkcə dərdimiz olanda Allahdan kömək istəməyə yox, həm də sevincimizi paylaşmaq, sevinci yaşatdığı üçün ona şükür etmək üçün əlimizi açaq Ona. Allahım, səni çox sevirəm.
İndi mənə deyin görüm: Pulu seçərdiniz, yoxsa gözü, əl-ayağı,dili, qulağı?
Mən əlbəttə ki, ikincisini seçərdim... İndi düşünürəm ki, mən həqiqətən də çox zənginəm.
XƏBƏR LENTİ
- ŞƏRHLƏR