Bu gün Qadin.Net saytının baş redaktoru, yazıçı Xəyalə Murad növbəti uğuru ilə qəlbimizi fərəhləndirdi. O "Женское Дерево ресурсности" adlı beynəlxalq ədəbiyyat müsabiqəsində III yer tutub. Bu xoş xəbəri eşidər-eşitməz Xəyalə Muradı sorğu-suala tutdum.
-Əvvəla səni ürəkdən təbrik edirəm!
-Təşəkkür edirəm, var ol!
-Qələbəyə inanırdın?
-İnam hər şeyin başlanğıcıdır, əlbəttə, inanırdım. Mənə görə beynəlxalq müsabiqədə III yer I yerə bərabərdir.
-Hər gün müxtəlif növ müsabiqələr elan edilir, necə oldu ki, məhz bu müsabiqədə iştirak etmək qərarına gəldin?
-Eyni anda bir neçə beynəlxalq müsabiqədə iştirak etdiyim üçün yeni elan edilən müsabiqələrdən xəbərim olur. “Женское Дерево” məni öz ideyası və adı ilə cəlb etdi.
-Müsabiqənin əhəmiyyəti nədədir?
-Qadın yazıçıları kəşf etmək, onların gözü ilə qadın qəlbinə nəzər salmaq, zərif varlığın sahib olduğu bütün gözəllikləri üzə çıxarmaq. İştirakçılar təqdim edilən 12 mövzudan bir və ya bir neçəsinə müraciət edə bilərdi. Mən də üç mövzu seçdim: “Sevgi-Güc və İnam”
-Hədiyyən nədən ibarət oldu?
-Hədiyyəm “Sertifikat” oldu. Düzdür standart hazırlanıb. Qalib adı qeyd edilməyib. Lakin I və II yerin sahiblərinə də bu cür verildiyindən məni qane etdi. Əlavə olaraq 5000 rubl. dəyərində mükafat aldım və hekayəm digər qaliblərin hekayələri ilə birlikdə kitab halında nəşr olunacaq.
-Bu müsabiqələr sənə nə qatır?
-Özümü beynəlxalq səviyyədə sınamaq, yeni mövzu axtarışı, bacarığımın həddini aşmaq, özümü və istedadımı müxtəlif yöndə kəşf etmək...
-Yaradıcılıq və ilk milli qadın portalının baş redaktoru olmaq bir-birinə mane olmur ki?
-Mən on yaşımdan yazıram. Bu ruhumun tələbidir. Gündəlik hava-su qəbulu qədər vacibdir. Redaktorluq isə işimdir. Həyatımda heç nəyi yarımçıq qoymağı sevmirəm. Tam məsuliyyətlə işimin öhdəsindən gəlməyə çalışıram və gəlirəm. Hədəfimin mənbəyi arzularımdır. Arzularımı hədəfə çevirməklə onları nəinki reallaşdırır, hətta gücümə-güc qatıram. Yanımda olan, mənə dəstək olan hər kəsə minnətdaram.
-Bildiyim qədəri ilə beynəlxalq müsabiqələrdə ilk qalibiyyətin deyil. Ümumiyyətlə, qalibiyyət duyğusu necə bir hissdir?
-Bəli, “LenFilm” kinostudiyasının elan etdiyi beynəlxalq ssenari müsabiqəsində düşünürəm ki, layiqli yer tutmuşam. Həmin ssenarini Dilogiya şəklində oxucularıma təqdim etməyi düşünürəm. 2017-ci ilin noyabr ayında İsveçdə keçirilən "VI Beynəlxalq Ədəbiyyat Festivalı”nın Finalisti oldum. Bir də indi Avrasiya materiki üzrə keçirilən “Beynəlxalq ədəbiyyat müsabiqəsinin III yerə çıxdım. Qalibiyyət özümə inamı artırır. Məğlubiyyət inkişaf əzmimi yüksəldir.
-Xəyalə Murad, sənə gələcək fəaliyyətində uğur arzulayıram!
-Təşəkkür edirəm!
Aysel İsgəndərova
XƏBƏR LENTİ
- ŞƏRHLƏR