16.06.2014-11:15

• Xəbərlər

39 568

2

“Sabah” qəzetindən Azərbaycanı da silkələyəcək yazı Ölkəmizdə də geniş satılan “Milupa Aptamil Südlü Taxıl Qarışığı” ilə bağlı Türkiyədə sensasion araşdırma üzə çıxıb və qidanın tərkibində GMO olduğu təsdiqlənib. Qonşu ölkədə bu məhsulları satışa buraxanlar üçün uzunmüddətli həbs cəzası nəzərdə tutulur. Səhiyyə Nazirliyi qalmaqalı araşdıracaqmı?.. Milli.Az Yeni Musavat-a istinadən bildirir ki, Türkiyənin Qida Əkinçilik və Heyvandarlıq Nazirliyinin keçirdiyi monitorinq zamanı uşaq qidaları ilə bağlı sensasion məqamlar üzə çıxıb. Məlum olub ki, Bakıda da satışda olan “Milupa Aptamil Südlü Taxıl Qarışığı” adlı məhsulda GMO (genetik modifikasiya olunmuş) elementləri aşkarlanıb. Bursa şəhərində nazirlik əməkdaşlarının təsbit etdiyi bu nəticə barədə öncə gidahareketi.org saytı yazıb, ardınca isə Türkiyənin tanınmış “Sabah” qəzeti xəbəri tirajlayıb. GMO-nun varlığından əmin olmaq üçün bu uşaq qidasından nümunələr götürülərək Ankaradakı Nəzarət Laboratoriyasına göndərilib. Ankara Nəzarət Laboratoriyasının keçirdiyi analizlər nəticəsində  Milupanın tərkibində GMO olduğu dəqiqləşib. Bunun ardınca nazirlik GMO-lu Milupa məhsullarının bazardan yığışdırılması üçün sözügedən bölgənin valiliklərinə müvafiq göstəriş verib. Qida Əkinçilik və Heyvandarlıq Nazirliyinin verdiyi açıqlamada isə nəticə bir daha təsdiqlənib və bildirilib ki, əlaqədar şəxslər barədə hüquqi məsuliyyət nəzərdə tutulacaq. Türkiyənin 5977 saylı biotəhlükəsizlik qanununun 15-ci maddəsində qidalarda GMO olanları satışa buraxanlar üçün 5 ildən 12 ilə qədər həbs cəzası nəzərdə tutulur. Nazirliyin açıqlamasında aşağıdakılar qeyd edilib: “Sözügedən uşaq qidasının idxalı zamanı GMO aşkarlanmadığı üçün satışına icazə verilib. Amma bazar monitorinqləri nəticəsində bu qidalarda GMO üzə çıxdığı üçün onların satışdan yığışdırılması barədə qərar verilib və səlahiyyətli şəxslər barədə hüquqi məsuliyyət nəzərdə tutulub”. “Sabah” qəzeti GMO qalmaqalını ortaya çıxaran rəsmi sənədlər də yayımlayıb (Yazıya əlavə edilib). Bu o deməkdir ki, Azərbaycan bazarına yol tapan bu uşaq qidaları Türkiyədə faktiki qadağan edilib.  Firma isə baş vermiş hadisə ilə bağlı yaydığı açıqlamada faktı təsdiqləmək məcburiyyətində qalıb. Firma bildirilib ki, 2013-cü ilin oktyabr ayında nazirlik tərəfindən analizləri aparılmış və tərkibində GMO aşkarlanmayan, 28.03.2015 (son istifadə müddəti) tarixli nömrəyə sahib uşaq qidası tamamən qatqısızdır. Firma rəhbərliyi bildirib ki, Türkiyədə GMO analizlərində istifadə olunmalı olan üsullarla bağlı fikir ayrılığı olduğundan hər laboratoriyanın analizi fərqli nəticə ortaya qoya bilər: “Haqqında danışdığımız bu məhsula aid laboratoriya analizlərindəki nəticə fərqliliyi də məhz bu səbəbdən üzə çıxıb. Nümunələr götürüləndə və ya laboratoriyalarda iş prosesi zamanı, ümumən isə bütün mərhələlərdə meydana gələ biləcək hər hansı bulaşma ehtimalı da laboratoriyaların fərqli nəticələrinə gətirə bilər”.Firma rəhbərliyinin sözünün yazılı açıqlamasının sonunda o da qeyd edilib ki, son istifadə tarixi 28.03.2015 xaricində olan hər hansı Aptamil qidası üçün bu iddia uyğun deyil. “Yeni Müsavat” isə öz növbəsində xatırladır ki, sözügedən qida məhsulları Bakının apteklərində də satışdadır və ailələr arasında yetərincə populyardır. Yuxarıda yazdığımız xəbər, habelə tarixlə bağlı qeyd də valideynlər üçün maraqlı ola bilər. Bu arada xatırladaq ki, 2014-cü ilin fevral ayında da bu uşaq qidası ilə bağlı oxşar situasiya yaranmışdı. Həmin vaxt “Aptamil PDF”i buraxan şirkət öz məhsullarını təcili toplamışdı. Dünya Səhiyyə Təşkilatı (DST) bütün dünya ölkələrinə xəbərdarlıq məktubu göndərib. Həmin xəbərdarlıqda Numil Qida Məhsulları ASC-nin istehsal etdiyi “Aptamil PDF” adlı uşaq yeməklərinin satışını təcili dayandırmaları tələb olunur.Məlumatda deyilirdi ki, şirkətin istehsal etdiyi uşaq qidalarının 294421 və 294433 nömrəli partiyalarının tərkibində çoxlu miqdarda yod və duz olduğu aşkarlanıb. Bu isə uşaqlarda sürətli şəkildə zəifləmə, sinir sistemi pozğunluğu və mədə problemləri yarada bilər. DST də bu səbəbdən “Aptamil PDF”i istehsal edən şirkətlə birlikdə həmin məhsulu dünya ölkələrindən toplamaq barədə qərar çıxarıb. Göründüyü kimi, Bakıda satılan sözügedən uşaq qidası ilə bağlı məsələ yetərincə təhlükəlidir. Bu uşaq qidaları ilə bağlı ciddi araşdırma isə (həm də firmanın dediyi istifadə müddəti ilə bağlı) Səhiyyə Nazirliyinin səlahiyyətindədir. İyunun 15-i bazar günü olduğu üçün Səhiyyə Nazirliyindən rəsmi mövqe öyrənə bilmədik. 

Mənbə: Milli.Az

0 0

[lang=az]Şikayət et[/lang] [lang=en]Complain[/lang] [lang=ru]Пожаловаться[/lang] [lang=tr]Şikayetçi ol[/lang]

Deniz84