Azərbaycanda və ümumiyyətlə, dünyada ən mükəmməl layihələrdən olan “Şahdağ” qış-yay turizm kompleksi oxşar istirahət mərkəzlərindən bənzərsizliyi ilə fərqlənir. Qusar rayonunun mərkəzindən 32 kilometr məsafədə Şahdağ Milli Parkının ərazisində dəniz səviyyəsindən 1300-2300 metr yüksəklikdə yerləşən bu turizm kompleksinin ərazisi 2058 hektardır. Artıq ölkəmizdən kənara çıxmadan qışda və yayda xizəkdə sürüşməklə idman etmiş olarıq. Xizək sürmək 6-60 yaş arasında, sağlamlıq problemi olmayan hər kəsin edə biləcəyi idman növüdür. Bu idmana başlamaq istəyənlərin bilməsi vacib olan bəzi bilgilərlə tanış olun.
Qışın ən həyəcanlı istirahəti: xizək
Qış aylarının ən əyləncəli məşğuliyyətlərindən biri xizək idmanıdır. "Xizək idmanı üçün yaşım çoxdur, ya da tezdir" deyə düşünməyin!
Bir çox idman növü üçün yaş böyük nisbətdə vacib ola bilər. Ancaq xizək idmanında bu, problem deyil. Yaş həddinin orta hesabla 6-60 yaş arası olması hər kəsə xizək sürmək imkanı yaradır. Sağlamlığınızda hər hansı bir problem yoxdursa, yaşınız neçə olursa-olsun, bunu təcrübədən keçirə bilər, hətta bütün texniki bilikləri öyrənib yaxşı xizəkçi ola bilərsiniz.
Bu, təcrübədən asılıdırmı?
Xizək idmanının qabiliyyətlə əlaqəsinin olmadığı həqiqətdir. Bu idman növü ayaq üstə dura bilən hər bir insan üçün maraqlı və həyəcanlı seçim ola bilər. İstəyi olan, xizək sürməkdə israrlı olan hər kəsin mütləq bu sahənin mütəxəssisindən öyrənməsi məsləhət görülür. Bu idmanda anadangəlmə qabiliyyətin olub-olmasının əhəmiyyəti olmasa da, təhsil almanın əhəmiyyəti çoxdur.
Xizək təhlükəli bir idmandırmı?
Son illərdə təkmilləşmiş avadanlıq çeşidləri, professionalların köməyilə seçəcəyiniz doğru avadanlıqlar xizək idmanının təhlükəli olma ehtimalını demək olar ki, sıfra endirir. Təbii ki, hər bir idman növündə olduğu kimi burada ən vacib amil müəllimlə işləməkdir. Öz-özünüzə bəlkə qismən ayaq üstə dura bilərsiniz, ancaq özbaşına əsla ayaq üstə doğru durmağı və idman texnikasını öyrənə bilməzsiniz. Yəni xizək idmanının təhlükələrinin öhdəsindən gəlmək mütəxəssisdən idman texnikasını doğru öyrənməyinizdən asılıdır.
Bunlara diqqət edin!
Ayaq əzələlərinin güclü və tarazlığın yaxşı olması xizəkçinin ən vacib xüsusiyyətlərindən biridir. Səviyyənizə uyğun iz seçmək xizək idmanının ümumi qaydaları arasında önəmli yer tutur. Təzə başlayanlar tarazlıqlarını itirəcək ani hərəkətlərdən uzaq durmalıdır. Yorulanda mütləq istirahət edin.
XƏBƏR LENTİ
- ŞƏRHLƏR