"Rəsmi məlumata görə, Azərbaycanda tələbələrin cəmi 32 faizi, yəni təxminən hər üç nəfərdən biri dövlət sifarişilə təhsil alır. Mənə elə gəlir ki, bu yetərli deyil və burada bir natarazlıq var. Bilirik ki, dövlət sifarişli, yəni pulsuz təhsil almaq istəyən şəxslər üçün müəyyən qədər plan yeri olur və o dolduqdan sonra digər tələbələr ödənişli təhsil almalı olurlar. Elə tələbələr var ki, cəmi-cümlətanı 1 bal az topladığına görə ödənişli təhsil almalı olur. Məncə bu məsələdə dəyişiklik olmalıdır".
Bunu Milli.Az-a açıqlamasında Milli Məclisin Gənclər və İdman Komitəsinin sədri Fuad Muradovdeyib.
Komitə sədri bildirib ki, Təhsil Nazirliyinin təşəbbüsü ilə ali təhsil müəssisələrində hazırlıq qruplarının fəaliyyətə başlaması ali təhsilin əlçatanlığı baxımından mühüm əhəmiyyət daşıyacaq: "Dövlət sifarişi əsasında təhsil alanların sayı artarsa, rəqabətlilik formalaşacaq. Nəticədə təhsilin keyfiyyəti daha da yüksələcək".
F. Muradov bildirib ki, gələcəkdə tələbə qəbulu planları hazırlanarkən dövlət sifarişli yerlərin sayının artırılmasının nəzərdən keçirilməsi məqsədəuyğun olardı: "Xüsusilə, regionlarda yeni universitetlərin yaradılması, yaxud mövcud ali təhsil müəssisələrinin potensialının onların nəzdindəki kolleclər vasitəsilə gücləndirilməsi, ali təhsilin bakalavriat səviyyəsində fasiləsiz təhsilinin təmin edilməsi məsələləri diqqət mərkəzində saxlanılmalıdır".
XƏBƏR LENTİ
