Mərkəzi Bankın bu ilin noyabr ayının 1-nə olan onların məlumatına görə, ölkəmizdə fəaliyyət göstərən banklar tərəfindən ümumilikdə 17 milyard 800 milyon manat kredit verilib. Vaxtı keçmiş kreditlərin həcmi isə 943,4 milyon manatdır, yəni 5,3 faiz. Kim bilir, vaxtında qaytarılmayan həmin 943,4 milyon kreditlərin arxasında hansı faciələr, hansı problemlər durur. Hər halda heç kim öz istəyi ilə götürdüyü kreditin ödənişini gecikdirmək istəməz. Ümumiyyətlə, mümkün olduğu qədər kredit götürmə və ya başqasına zamin durma məsələsində diqqətli, ehtiyatlı olmaq lazımdır. Qəzetimizin ötən sayında “Qohumunun vədinə inanıb mülkünü banka girov qoyan ailə küçədə qalıb” adlı yazı dərc olunmuşdu. Oxucuların böyük marağına səbəb olan bu yazıda Mingəçevir şəhərində yaşayan Vəliyevlər ailəsinin öz evlərindən çıxarılması barədə məlumat vermişdik. Səbəb isə odur ki, yaxın qohumu bu ailənin etibarından istifadə edərək onların evini banka girov qoyub, ancaq bunun müqabilində götürdüyü krediti ödəmədiyi üçün ev satışa çıxarılıb və başqası tərəfindən alınıb. Ancaq, heç şübhəsiz ki, ailənin öz məsuliyyəti də az deyil - bir imza ilə mülkünü girov qoyursan, amma sabah bir problem çıxanda dilə-dişə sən düşürsən, evindən olursan. Mövzu ilə bağlı “Zaman-Azərbaycan”ın suallarını cavablandıran hüquqşünas İlham Məmmədov vətəndaşlara yaxından tanımadıqları, krediti rahat şəkildə ödəyə biləcəyinə əmin olmadıqları insanlara kredit götürərkən zamin durmamağı, evlərini girov qoymamağı məsləhət gördü: “Əgər siz birinin kredit götürməsi üçün ona kömək məqsədi ilə evinizi banka girov qoymağa razılıq verirsinizsə, ancaq hər hansı tərəddüdünüz varsa, yaxşı olar ki, bu halda bir müqavilə tərtib edib, notarial qaydada təsdiqlətdirəsiniz. O müqavilədə qeyd oluna bilər ki, məsuliyyəti krediti götürən şəxs daşıyır və dəymiş ziyanı o ödəməlidir”. Hüquqşünasın dediyinə görə, notarial qaydada təsdiqlənmiş razılıq sənədi olduğu təqdirdə, zamin duran tərəfə dəymiş ziyan sonradan tələb oluna bilər: “Bütün hallarda isə mən bir daha vətəndaşlara şübhələri və ya tərəddüdləri olduğu təqdirdə, bu cür kreditlərə görə zamin durmamağı tövsiyə edirəm”.
XƏBƏR LENTİ
- ŞƏRHLƏR