Siz də zəng gözləyirsiniz?
18 800
0
İnsanın keçirdiyi stress orqanizmin sensor həssaslığını hədsiz artırırSon dövrlərdə artan xəyali zəng sindromu mütəxəssislərin diqqətini çəkib. Xəyali zəng sindromu - insanın vaxtaşırı, heç bir əsas olmadan sanki zəng səsi eşitməsidir. Müxtəlif əsəb xəstəlikləri olan və ya stress keçirən insanlar bu halı hətta hallüsinasiya kimi qəbul edərək psixoloq və psixiatrlara müraciət edirlər.
Psixoloq Ceyran Həsənli bildirib ki, bu sindrom keçirilən hər hansı bir stress nəticəsində orqanizmin sensor həssaslığının artması kimi ortaya çıxır:
"Məlum olub ki, bu sindromdan əziyyət çəkənlərin 60%-i bir müddət əvvəl mühüm və həlledici zəng gözləyib və bu zəng əsasən xoşagəlməz bir halla bağlı olub. Maraqlıdır ki, həmin insanlar sonralar da xoşagəlməz bir vəziyyət və ya söhbət zamanı bu sindromu yenidən hiss ediblər. Və həmin anlarda mənfi emosiyalar yaşamış, bunu gizlətməyə məcbur olublar. Belə ki, güclü neqativ emosiyaların basılması bu sindromu yaradan şərtlərdəndir. İnsanın keçirdiyi stress orqanizmin sensor həssaslığını hədsiz artırır və bu da öz növbəsində sağlamlığa öz mənfi təsirini göstərir".
C.Həsənlinin sözlərinə görə, xəyali zəng sindromu çox vaxt yüngül hallarda öz-özünə keçir: "Yalnız 40% hallarda isə kənar müdaxilə lazım gəlir. Belə ki, bu hal 1 həftə və ya daha artıq bir zaman davam edərsə, bu, orqanizmin əsəb sisteminin hədsiz zəiflədiyindən xəbər verir. Təbii ki, belə hallarda psixiatr və psixoloq yardımından faydalanmaq vacibdir".
Müsahibimiz onu da bildirib ki, son illər ərzində xəyali zəng sindromundan əziyyət çəkənlərin sayı artmaqdadır: "Xəyali zəng sindromundan əziyyət çəkənlərə elə gəlir ki, kimsə zəng vurur. Tez-tez qulaqlarına telefon zəngi gəlir. Dəstəyi qaldıranda isə heç kimin zəng etmədiyinin şahidi olurlar. Bu hal mütəmadi baş verir və ağır hallarda uzun müddət sürür".
Mütəxəssis qeyd edib ki, insanlar nəinki xəyali zəng eşidirlər, həm də mobil telefonun vibrasiya etdiyini də hiss edirlər. 80%-ə yaxın insanlar telefon sakit durduğu yerdə onun vibrasiya etdiyini hiss edir.
Araşdırmalara görə, yalnız telefon deyil, digər elektron vasitələrdən də xəyali zəng və ya mesaj səsi eşidənlər olur.
Qərbi Avropa, ABŞ və Yaponiyada aparılan təcrübələr əsasında məlum olub ki, xəyali zəng sindromundan əziyyət çəkən insanların əksəriyyəti günün çox hissəsini kompüter arxasında və ya mobil telefonunu qurdalayaraq keçirir. Bu ölkələrdə əhalinin 60-80%-i xəyali zənglər eşidir. Eləcə də məlum olub ki, Yaponiyada xəyali zəngləri eşidənlər daha çoxdur.
Psixoloq bildirib ki, xəyali zəng və ya vibrasiya hallüsinasiya şəklində olan gurultu səsi, güllə səsi, fışıltı ilə bağlı deyil: "Pis xəbəri telefon vasitəsilə eşidənlər də xəyali zəng səsi eşidə bilərlər. Onlar çox həyəcanlanır və yenə də pis xəbər eşitdiklərindən ehtiyat edirlər. Yenə zəng gələcəyindən qorxurlar. Ona görə onlara elə gəlir ki, zəng səsi gəlir".
Lakin bir sıra mütəxəssislər - otorinolarinqoloq və auidioloqlar bu qənaətə gəliblər ki, xəyali zəngləri eşitmə iri şəhərlərdə, səs-küyün çox olduğu yerlərdə eşitmə analizatorun reseptor aparatın qıcıqlanması ilə bağlıdır. Belə ki, çox səs-küylü yerlərdə çox adam yalançı səslər eşidir. Tam sakitliyin sürdüyü yerlərdə də insan xəyali səs-küy eşidə bilər. Bu ona görə baş verir ki, müasir həyatda daim informasiya qəbulundan yorulan beyin müvəqqəti səssizlik şəraitində səs eşitməyə başlayır. Məşhur işgəncədə də belədir. İnsanı tam səsdən izolyasiya olunmuş otaqda tək saxlayırlar. Müəyyən vaxtdan sonra insan səs eşitməyə başlayır.
Həmsöhbətimizin dediyinə görə, insanların daim zəng, internetdə yazışarkən mesaj səsini gözləməsi, oxşar səs eşidən kimi bunu zəng səsinə bənzətməsi ilə nəticələnir. Həm də insan özünü lazımlı və vacib hiss etmək istəyir. Bu səbəbdən də insan zəngi gözləyir. Zəng gəlməsə belə, telefonu açıb yoxlayır, elektron poçtunu və çatı tez-tez açıb baxır. Bu da sonda xəyali zənglərin eşidilməsi ilə nəticələnir. Bu cür təəssürat öyrəncəklik nəticəsində də yarana bilər.
Mənbə: Milli.Az
XƏBƏR LENTİ
