Kameranın quraşdırılması təhlükəsizlik baxımından çoxlarını qane etsə də, bəziləri bundan ehtiyat edir.
Əksər şirkət rəhbərləri işçilərinə nəzarət etmək üçün çox ciddi iş rejimi yaradır. İşçilərin otaqlarında, dəhlizdə, eyvanda kamera quraşdırır və iş saatlarında işçilərə nəzarət edir. Lakin iş yerində kameranın olması rəhbərlik tərəfindən yaxşı qəbul olunsa da, işçilərin sərbəstliyini əlindən alır.
İri şirkətlərdən birində ofis-meneceri vəzifəsində çalışan Elmira Cəfərovanın sözlərinə görə, maaşından razı olsa da, iş yerində kameraların olması onu narahat edir: "Özümü sərbəst hiss edə bilmirəm. Hər yerdə kamera quraşdırılıb. Oturduğum yerlə də üzbəüz kamera var. Adicə kimdənsə bir söz soruşanda da kameranın çəkdiyini düşünür və çox sıxılıram. İş yerimdə rahat otura bilmirəm. Hər an düşünürəm ki, mənə baxır və qulaq asırlar. Gün ərzində gərgin olmağım məni çox yorur. Bu səbəbdən də artıq başqa iş yeri axtarıram".
Qeyd edək ki, iş yerlərində kamera quraşdırılırsa, bu haqda işçiyə məlumat verilməlidir. İşçi işə düzələrkən iş şəraiti, vəzifəsi və öhdəlikləri barədə məlumatlandırılmalıdır. Hüquqşünas Mahir Ağayevin sözlərinə görə, şirkət rəhbərliyi iş yerində kamera quraşdıra bilər: "Bu: iş yerində oğurluq hadisələrinin qarşısını alır və təhlükəsizliyi təmin edir. Mətbəxdə, iş otaqlarında, ümumi dəhlizdə kameraların quraşdırılması qanunidir. Ayaq yolunda isə kamera quraşdırmaq olmaz" deyən hüquqşünas əlavə edib ki, kameralardakı video-yazıya yalnız müəyyən səlahiyyətlərə malik şəxslər - rəhbərlik, işəgötürən və onun icazə verdiyi digər şəxslər, təhlükəsizlik məsələlərinə cavabdeh işçilər baxa bilər. Video-yazıya baxan şəxslər bu görüntüləri yaymamalı, işçilərə hədə-qorxu gəlməməlidir. Bu yazılar yalnız müəyyən adamların baxa bildiyi xüsusi arxivlərdə saxlanılmalıdır".
M.Ağayev bildirib ki, iş yerindəki çəkilişləri yaymaq qanunsuzdur və şəxs buna görə cəzalandırıla bilər: "İş yerində lentə alınan video-yazıları aşkara çıxarmaq, sosial şəbəkələrdə yaymaq, görüntülərdəki şəxsi ifşa etmək yolverilməzdir" deyən müsahibimizin sözlərinə görə, iş yerindəki çəkilişlərdən istifadə edərək hədə-qorxu ilə nəsə tələb etmək də qanunsuzdur.
Şirkət rəhbəri Aydın Əkbərovun sözlərinə görə, iş yerində kameraların olması işdə nizam-intizamı təmin etməyə kömək edir: "Kamera olanda iş yerində sakitlik olur, işçilər öz işini itirməkdən qorxduqları üçün daha yaxşı işləyir, diqqətini kənar məşğuliyyətlərə sərf etmirlər. İşçilərə kameradan nəzarət etməklə, məhz hansının işə, iş şəraitinə uyğun gəldiyini dəqiq müəyyən etmək olur. Oğurluq, mübahisə halları azalır. Nəsə baş verəndə video görüntüyə baxmaqla hər şeyin necə olduğunu aydın başa düşmək olur. İş yerində kameranın olması iş prosesinin keyfiyyətini yüksəldir".
Psixoloq Jalə Həmidlinin sözlərinə görə, hər bir insan başqalarına özünü olduğundan yaxşı göstərmək istəyir: "Bu səbəbdən də iş yerində çəkiliş olduqda, özündən asılı olmadan işçilər özlərini daha yaxşı aparır, bir-birinə kömək edir, mülayim davranır və daha yaxşı işləyirlər. Lakin qapalı və utancaq, tənhalığa meylli olanları iş yerində kameranın olması çox sıxır və onlar gün ərzində gərgin olur, iş qabiliyyətlərini tam göstərə bilmirlər. Daha ünsiyyətcil insanlar qısa müddət ərzində kameranın olduğunu unutsalar da, belə adamlar oturub-duranda belə kameranın olduğundan sıxılırlar. Bu da onların iş qabiliyyətinə mənfi təsir edir".
XƏBƏR LENTİ
- ŞƏRHLƏR