Analar və qızları
78 110
38
"Sən məni başa düşmürsən!", - bu ifadəni analar və uşaqlar bir-birilərinə tez-tez deyirlər.
Ana və qız arasında problemlər müxtəlif səbəblərdən yaranır. Ananın təhsili, milli mənsubiyyəti, yaşı, böyüyüb boya-başa çatdığı coğrafi ərazi, işlədiyi mühit, dünyagörüşü və s. gələcək ailədaxili məsələlərdə əsas rol oynayır. Xüsusilə yaş fərqinin və təhsil səviyyəsinin aşağı olduğu ana-qız əlaqələrində qarşıdurmaların yaranması qaçılmazdır. Qadın erkən yaşda nikaha girir, dünyagörüşü formalaşmamış, özünü dərk etməmiş övlad sahibi olur. O, ailə həyatına və ana olmağa psixoloji olaraq hazırlıqlı olmur, ailə məsuliyyətini dərk etmır. Beləliklə gələcək münasibətlərdə yarana biləcək problemlərin özülü qoyulur. Ananın dediklərini qız, qızın dediklərini ana həzm edə bilmir.
Qız üçün övladını hər addımda tənqid edən ana dözülməz olur. Övlad valideyndən getdikcə soyumağa başlayır, “onsuz da mən dediyimi o başa düşməyəcək, niyə başımı ağrıdım ki?” şüarını əsas götürür.
Ana və qız arasında mübahisə yaradan 7 əsas məsələ
Otağını yığışdırmamaq, ev işlərində anasına kömək etməmək.
Uzun müddət kompüter qarşısında oturmaq.
Dərsə məsuliyyətli yanaşmamaq.
Ana evə gəliş-gediş vaxtlarına ciddi nəzarət edir, gənc qız buna əməl etmir.
Gənc qızın seçdiyi stil, bəyəndiyi geyim ananın xoşuna gəlmir.
Uzun müddət telefonla danışmaq ananın hirslənməsinə səbəb olur.
Rəfiqə, dost və ya həyat yoldaşı seçimi ananı qane etmir, bu da açıq qarşıdurmalara səbəb olur.
Qızlar nələri bilməlidirlər
Qız ananın tənqidlərinə, iradına mülayim yanaşmalıdır. Yaddan çıxartmayın ki, o, ananızdır və sizin yaxşılığınızı istəyir.
Ananızdan nəyisə sizin gördüyünüz kimi görməyi tələb etməyin. Fərqli məqamları açıq şəkildə danışın. Bu daha həlledici olar.
Hər mübahisə etdikdə özünüzü ananızın yerində hiss edin. Sizin də övladınız olacaq. Siz də ana olacaqsınız.
Əsasən də 2-5 yaşarası qız uşaqları cinsi şəxsiyyətlərinin inkişaf etdiyi bir dövrdə ananın ətrafında çox dolanırlar. Ananın etdiklərini təqlid edir, ona kömək etmək istəyirlər. Bu dövrdə analar qızlarının onlara kömək etməsini dəstəkləməlidirlər. Diqqətli olmalıdırlar. Çünki uşaq məktəbə gedəndə xarici aləmlə tanış olacaq. Valideyndən qismən uzaqlaşacaq.
Onunla yoldaş olmağa çalışın. Ana-qız arasında nəsil fərqi var. Sizə həlledici görsənən məqamlar onun üçün axmaq görünə bilər. Bu səbəbdən ağıl vermək yerinə yaxşı dinləyici olun. Hər bir çətinlikdə yanında olacağınıza inandırın.
Cinsi bilgilər mövzusunda açıq danışın. Belə mövzuları qadağan etməkdənsə, ortaq bir sədd seçin, uyğun bir dildə bildiklərinizi paylaşın. Yadda saxlayın ki, qadağan edilən şeylər insanı daha böyük səhvlər etməyə məcbur edir.
Ona dərs vermək yerinə öz təcrübələrinizi və xatirələrinizi paylaşın. Ancaq bu o demək deyil ki, qızınız sizin kimi hərəkət edəcək. Ana və atalar övladlarına doğru bildiklərini öyrədə bilərlər. Ancaq övladlarının necə davranacaqlarını və hansı yolu seçəcəklərini təyin edə bilməzlər.
Unutmayın ki, həddindən artıq nəzarət övladınızı sizdən uzaqlaşdıra bilər.
Ananızla yaşadığınız qarşıdurmalar qızınızla münasibətinizdə davam edə bilər. Ananızda xoşlamadığınız hər hansı bir xüsusiyyəti qızınızda görüb narahat ola və ya özünüzdə xoşlamadığınız bir cəhəti qızınızda görüb tənqid edə bilərsiz. Özünüzdə dəyişdirə bilmədiyiniz bir cəhətə görə qızınızı günahlandırmaq haqsızlıqdır. Axı o hər şeyi sizdən öyrənir. Qızınızın xasiyyətini dəyişə bilmirsinizsə, öz üzərinizdə işləyib ona nümunə olun.
Qızınıza öz xəyallarınızı yükləməyin. Gerçəkləşdirə bilmədiyiniz xəyalları qızınızın gerçəkləşdirməsini gözləməyin. Qoy onun da öz xəyallarını qurmaq və ona çatmaq azadlığı olsun. Axı o ayrıca bir fərddir. Özünə inamlı, güclü bir qız uşağı böyütmək istəyirsinizsə, hər şeydən əvvəl ona inanın, həmişə dəstək olun. İstər uğurlu, istərsə də uğursuz olduğu vaxtlarda yanında olduğunuzu hiss etdirin.
“Niyə başqasının qızı elədir, mənimki deyil” kimi şikayətlər qızda “anasına layiq bir övlad” ola bilməyəcəyi duyğusu yaradır. Onu həvəsdən salır.
XƏBƏR LENTİ
- ŞƏRHLƏR