ABŞ Prezidenti Donald Trampın 28 May - Respublika Günü və XXIV Beynəlxalq "Xəzər Neft və Qaz-2017" sərgi və konfransı ilə əlaqədar Azərbaycan Prezidenti İlham Əliyevə ardıcıl 2 təbrik məktubu ünvanlaması və bu məktublarda Azərbaycanla münasibətlərə önəm verilməsi xüsusi diqqət çəkir. Məktublarda D.Trampın həm Azərbaycan və ABŞ, həm də dünya üçün daha gözəl gələcək naminə Prezident İlham Əliyevlə fəal tərəfdaş kimi işləməyi səbirsizliklə gözlədiyini qeyd etməsi, Azərbaycanı ABŞ-ın dəyərli tərəfdaşı adlandırması, Azərbaycanla münasibətlərin inkişafını, eləcə də iki ölkə arasında yeni faydalı biznes əlaqələrinin qurulmasını istəməsi, Cənub Qaz Dəhlizini dəstəkləməsi, Azərbaycanla birgə həyata keçirilən layihələrə böyük önəm verməsi və Azərbaycan inkişafını, enerji təhlükəsizliyinin qorunması yönündə səylərini dəstəklədiyini bildirməsi və s. isti mesajların verilməsi diqqətdən yayınmır.
ABŞ prezidentinin bu cür yanaşmasının pərdəarxasını və hadisələrin mümkün inkişafını Milli.Az-a şərh edən təhlükəsizlik və geosiyasi məsələlər üzrə ekspert Arzu Nağıyevin fikrincə, əgər Azərbaycan ABŞ prezidenti səviyyəsində strateji tərəfdaş kimi təqdim olunursa, bu çox müsbət və təqdirəlayiq haldır:
"Donald Tramp Azərbaycanla münasibətləri yüksək dəyərləndirir və ölkəmizin dünyanın enerji təhlükəsizliyinə təhdidlərin qarşısının alınmasında rol oynayan bir dövlət olduğunu bildirir. Böyük regional iqtisadi layihələrdə Azərbaycanın birbaşa iştirakının dəstəklənməsi də müsbət hal kimi qiymətləndirilməlidir. Bundan başqa Amerika prezidentinin hər iki məktubunda əsas məqamlardan biri Azərbaycanın regionda aparıcı dövlət olduğunu vurğulamasıdır. Bu isə regionda bir sıra dövlətlərə mesaj kimi qiymətləndirilməlidir.
Bu məqamlar göstərir ki, ABŞ həm terrorizmlə mübarizədə, həm iqtisadi layihələrdə, həm tolerantlıq və multikultural dəyərlərin qorunmasında, həm regionda təhlükəsizlik məsələsini həll etməyə çalışan bir dövlət kimi Azərbaycanın rolunu müsbət və yüksək qiymətləndirir, eyni zamanda ikitərəfli münasibələtlərin inkişafı istiqamətdə müvafiq addımların atılması üçün müəyyən qərarlar verməyə hazırdır.
Düşünürəm ki, bütün bunlar göstərir ki, ABŞ-ın ATƏT-in Minsk qrupunun həmsədri kimi, Dağlıq Qarabağ münaqişəsinin tənzimlənməsində də müsbət rolu ola bilər".
A.Nağıyev D.Trampın Azərbaycan Prezidentinə ünvanladığı müraciətlərdəki fikirlərin iki ölkə arasında münasibətlərdə yeni dönəminin başlandığı ilə bağlı mülahizələri də dəyərləndirib: "Ümumiyyətlə ABŞ və Azərbaycan arasında elə də böyük problemlər yaşanmırdı. Lakin təəssüf ki, bəzi neqativ hallar da müşahidə edilirdi. Bununla yanaşı bəzi qonşu dövlətlərdə Azərbaycan-Amerika əlaqələrinə dair müəyyən fikir və bəyanatlar səsləndirilirdi. Amma təbii ki, cənab Trampın bu fikirlərinə ABŞ-ın Azərbaycanla münasibətlərinin bundan sonra daha yaxşı inkişaf edəcəyinə dair bir mesaj kimi baxmaq olar. Bu mesajlar ümid verir ki, ABŞ əvvəllər olduğu kimi daha digər ölkələrin daxili işlərinə müdaxilə etməyəcək, münasibətlərini onları idarə etməyə çalışmaq prinsipi üzərində qurmayacaq. Bu siyasət ötən illərdə, xüsusən də Obama adminstrasiyası dövründə ABŞ-Azərbaycan əlaqələrindəki neqativ halların və soyuqluğun aradan qaldırılmasına töhfə verəcək.
İlkin İzzət
Milli.Az