ANS TV-nin məlumatına görə, Marneuli Gürcüstanın Ermənistanla həmsərhəd olan ərazilərindəndir. Marneulinin əsasən azərbaycanlılar yaşayan Sadaxlı kənd ərazi vahidliyinə daxil olan Təzəkənd kəndində ermənilər mövcud olmayan sərhəd xəttini son illərdə bir neçə dəfə irəli çəkiblər. Son hadisə isə insanların daha çox narahatlığına səbəb olub.
Uzun illərdir bu ərazilərdə yaşayan sakinlərin dediyinə görə əvvəllər Gürcüstan-Ermənistan sərhədi dağın yuxarı hissəsi ilə keçirmiş. Bir ay bundan öncə isə sakinlərə məlum olub ki, erməni sərhədçiləri sərhəd xəttini bir qədər də irəli çəkərək dağın ətəyinə doğru eniblər. Beləcə təkcə Təzəkənd ərazisində 130-140 hektar torpaq sahəsi Ermənistan ərazisində qalıb.
Həmin torpaqlarda kəndlilərin becərdiyi məhsullar da qalıb.
Təzəkənd sakini Fərman Əlləzov deyir ki, bu ilin iyun ayında əkin sahələrinə qəflətən erməni əsgərləri daxil olaraq ot sahələrini mənimsəyiblər.
Sakinlər deyir ki, dəfələrlə bu kəndlərdə onlara məxsus heyvanlar erməni hərbçilər tərəfindən tutulub. Gürcü sərhədçilərin işə qarışması ilə həmin mal-qara bir çox hallarda geri qaytarılsa da bunun mümkün olmadığı vaxtlar da çox olur.
Təzəkənd sakini Zöhrab Nəzərov isə bildirib ki, illər öncə əkin sahəsi kimi sənədləşdirilən torpaqlara indi ermənilər sahib çıxmaq istəyir.
Məsələ ilə bağlı Sadaxlı kənd icra nümayəndəsi Eldar Məmmədov qeyd etdi ki, deyilən ərazilər həqiqətən Ermənistan tərəfinə məxsusdur. Sadəcə əhalinin zamanında düzgün maarifləndirilməməsi səbəbindən onlar bu torpaqların Gürcüstana aid olduğunu zənn edirlər. O əlavə etdi ki, 1948-53-cü illərdə Sovet dönəmində çəkilən xəritədə torpaqlar necə bölünübsə, indidə o qaydada sərhədlər qalmaqdadır.
Ermənistan sərhədçilərinin Gürcüstanın ərazilərinə daxil olması ilə bağlı xəbərlər son günlərdə Gürcüstan mətbuatında geniş yer alıb. Hətta məsələ bu gün parlamentdə müzakirəyə çıxarılacaq. Gürcüstanın digər qonşu ölkələr kimi ermənistanla da sərhəd xəttinin çəkilməməsi bu iki ölkə arasında vaxtaşırı bu cür torpaq mübahisələrinin yaranmasına səbəb olur.
Mənbə: ANS PRESS