İstifadəçilər axşam saatlarında internetə daxil ola bilmədiklərini bildirirlər. “Bakinternet”in xidmətindən istifadə edən abunəçilərin sözlərinə görə, bir aya yaxındır ki, axşam saatlarından başlayaraq internetə girmək mümkünsüzdür. Yaranmış durumla bağlı müraciət etdikdə isə ATS-dən (telefon qovşağı) bildirilir ki, bu problem “Bakinternet”indir. Oradan isə ATS-in problemi olduğu söylənilir. Abunəçilər isə “Bakinternet”lə ATS-in arasında qalmalarından, problemin günlərlə uzanmasından şikayətlənirlər.
Qeyd edək ki, “Bakinternet”lə bağlı bu cür problemlər vaxtaşırı meydana gəlir və günlərlə uzanır. Şirkətdən problemin səbəbi barədə ziddiyyətli açıqlamalar verilir, ya da ümumiyyətlə suallar cavablandırılmır.
İki gün ərzində “Bakinternet”lə əlaqə saxlasaq da, suallarımızı normal şəkildə cavablandıran olmadı. “Bakinternet”in xidmətlər şöbəsinin rəisi Müşviq Sadıqov bildirdi ki, vəzifəsi artırılıb və artıq bu suallara cavab vermir. Qurumun rəhbərliyindən gün ərzində suallarımızı cavablandıran olmadı. Şirkətin özünü təqdim etməyən əməkdaşı bildirdi ki, rəhbərlik idarədə deyil, haradasa iş başındadır və həm də nasazlıqla bağlı problemlərdən danışa bilməz: “Bizdən də böyüklər var, məsələn, ”Baktelecom", ondan soruşun". “Baktelecom”dan isə bildirildi ki, problemlər təmir işlərinin aparılması ilə bağlıdır. Təmirin nə zaman bitəcəyi və vətəndaşlara normal şəkildə internetin veriləcəyi də məlum deyil.
Rabitə və İnformasiya Texnologiyaları Nazirliyinin mətbuat xidmətinin rəhbəriMüşviq Əmirov sözügedən provayderdə yaranan problemlərdən xəbərsiz olduğunu bildirdi. O, məsələnin araşdırılacağını və açıqlama veriləcəyini də vəd etdi.
Əldə etdiyimiz məlumata görə, “Bakinternet”in həftələrdir davam edən probleminin və abonentlərin internet kəsintisinin səbəbi avadanlıqların xarab və istifadəyə yararsız olmasıdır. Şəbəkə avadanlıqlarının dəyişdirilməməsi isə yekunda abonentlərin internetsiz qalması ilə nəticələnib. Bildirilir ki, texnikanın sıradan çıxması, həmçinin yeni yükləmələrə cavab verə bilməməsi provayderi çıxılmaz duruma salıb. Qeyd edək ki, “Bakinternet” ölkədə yaranmış ilk internet provayderlərdən biridir.
Mənbə: Milli.Az