Yoqada ayaq uzatma pozası – Uttana Padasana
Bu asana onurğa sütununun hərəkətliliyini yaxşılaşdırır, üz və boyun dərisinə cavanlaşdırıcı təsir göstərir, həzm sisteminin işini tənzimləyir, bel, qarın və sinə hissələrində qan dövranını, qalxanabənzər vəzini, gözləri, ağciyərləri və qarın boşluğu orqanlarını gücləndirir. Qarın nahiyəsində yığılan artıq piydən qurtulmağa kömək edir.
Asananın yerinə yetirilmə qaydası
Bel üstə uzanın və 3-4 dəfə dərindən nəfəs alın. Nəfəs verin, belinizi arxaya əyib nəfəs alın. Başınızın təpə hissəsini döşəməyə qoyun, əllərinizi döşəmədən yuxarı qaldırın və 2-3 dəfə dərindən nəfəs çəkin. Sonra ayaqlarınızı və əllərinizi qaldırıb 30 saniyəyə qədər bu pozada dayanın.
Əks göstərişlər
Hamilə qadınlara bu asananı hamiləliyin ilk 2-3 ayında etmək tövsiyə edilmir. Yüksək qan təzyiqi və qarın nahiyəsindən əməliyyat olunan insanlara asananı icra etmək olmaz.
Yoqada “Tam Qayıq” pozası – Paripurna Navasana
Bu asana sinir sistemini sakitləşdirir, bədənin müvazinətini gücləndirir, bel nahiyəsində olan piyi azaldır, böyrəkləri möhkəmlədir və mədə-bağırsaq pozuntularını aradan götürür.
Asananın yerinə yetirilmə qaydası
Döşəməyə oturun. Bədəninizi bir qədər arxaya aparın, ayaqlarınızı isə 60-65 dərəcəyə qədər qaldırın. Pəncələriniz başınızdan daha yuxarı səviyyədə olmalıdır. Əllərinizi budlarınıza və döşəməyə paralel qaldırın. Yoqaya yeni başlayanlar 20 saniyəyə qədər bu pozada dayana bilərlər. Tədricən saxlama müddətini 1 dəqiqəyə qədər uzadın. Asananın tarazlığı sağrı əzələləri hesabına olmalıdır.
Əks göstərişlər
Bu asananı astma xəstələri, tez-tez baş ağrısı, aşağı qan təziyiqi, ürək xəstəlikləri olan insanlara etmək tövsiyə edilmir. Hamiləlik dövründə və menstruasiya zamanı asanını etmək olmaz.
Günel