İranın paytaxtı Tehranda küçələrdə it gəzdirmək qadağan edilib.
Qadin.Net publika.az-a istinadən xəbər verir ki, bu qərar Tehran Baş Prokurorluğu tərəfindən qəbul edilib.
Səbəb isə xalqı ev heyvanlarını bəsləməkdən çəkindirməkdir. Qərara görə, heyvanlar artıq avtomobillərdə də gəzdirilməyəcək.
Tehranın Baş Polis İdarəsinin rəisi Hüseyn Rəhimi prokurorluqdan icazə aldıqlarını və park, küçə kimi ictimai yerlərdə it gəzdirənləri cəzalandıracaqlarını deyib. O bildirib ki, itlər insanlarda qorxu və təşvişə səbəb olur.
Qeyd edək ki, İranda itlərin ev heyvanları kimi saxlanması 1979-cu il İslam İnqilabından sonra mübahisəli mövzu olub. Din xadimləri itlərin təmiz heyvan olmadığını və onların evlərdə saxlanılmasının qərb mədəniyyətinə xas olduğunu deyir.
İran Mədəniyyət Nazirliyi isə 2010-cu ildə mediada ev heyvanlarının reklamlarda yer almasını qadağan edib.