Məşhur astrofizik Stiven Xokinq hesab edir ki, təcili Yer kürəsini tərk eləmək lazımdır.
Trend Sputnik-a istinadən xəbər verir ki, məşhur astrofizik Stiven Xokinq etiraf edib ki, onun üçün ən qeyri-adi kəşf kainatın sürətlə genişlənməsi olub: "1998-ci ildə məlum oldu ki, kainatın genişlənməsi təxmin edildiyi kimi zəifləmir, o, əksinə sürətlənir".
"Deyirlər ki, bunun səbəbi "qara enerji"dədir, lakin bu, sadəcə anlamadığımız məsələyə verdiyimiz bir addır. Xüsusilə, biz bilmirik ki, niyə bu dəyər sıfıra bərabər deyil və ya niyə sıfırdan yüksəkdir. Biz bu sürətin genişlənmə zamanı sabit qalıb qalmadığını da bilmirik", - deyə o əlavə edib.
İyirminci əsrin sonunadək hesab edilirdi ki, böyük partlayışdan sonra kainat genişlənir və bu genişlənmənin sürəti getdikcə zəifləyir. Lakin 1998-ci ildə tədqiqatçılar bu məlumatı təkzib edən sübutlar tapdılar. Yeni sübutlara əsasən, kainatın genişlənməsi sürətlə artır.
Bundan başqa Stiven Xokinq dünyanın sonunun gəldiyini bildirib. Onun sözlərinə görə, yaxın 1000 il ərzində dünya suni fəlakət nəticəsində məhv olacaq. Astrofizik bunun mümkün səbəblərini üç ssenari ilə bağlayır: nüvə müharibəsi, süni intellektin fəaliyyəti və ya genetik virus.
"Bu dünyadan qaçmazsaq axırımız yaxşı olmayacaq. Sivilizasiya tarixinin ən təhlükəli dövrünə giririk. Dünyadan yox olmağımız bir ana bağlıdır. Var olmaq üçün isə tək şansımız var. O da kainata yayılmaqdır", - deyə o bildirib.
Milli.Az