Azərbaycan-Ermənistan cəbhə xəttində son hərbi əməliyyatlardan sonra artıq Ermənistanda çox yaxşı başa düşürlər ki, onlar Azərbaycan Ordusuna qarşı dayana bilməyəcəklər. Artıq ermənilərdə panika, tam çaşqınlıq başlayıb. Onlar sadəcə belə bir şey gözləmirdilər. Həqiqətən, Azərbaycan Ordusu çox gözəl nəticə əldə etdi və özünü ən yaxşı tərəfdən göstərə bildi. Təsadüfi deyil ki, bu gün Azərbaycan Silahlı Qüvvələrinın adı hazırda dünyada ən güclülərin sırasında çəkilir. Bunu Milli.Az-a Azərbaycan Ordusunun işğal edilmiş Dağlıq Qarabağ və ətraf rayonlarda yerləşən Ermənistan silahlı birləşmələrinə qarşı apardığı son hərbi əməliyyatları şərh edərkən hərbi ekspert, istefada olan polkovnik Konstantin Manuxin bildirib.Hərbi ekspertin sözlərinə görə, ordu hər cür texnika və silaha sahib ola bilər, amma onu bacarıqlı idarə və tətbiq edən hazırlıqlı şəxsi heyəti yoxdursa, heç bir hərbi əməliyyatda uğur qazanmaq mümkün olmayacaq:
"Yalnız Azərbaycan Silahlı Qüvvələrinin və mütəxəssislərinin yaxşı döyüş hazırlığı ilə mövcud olan müasir silah və texnikadan təyinatı üzrə istifadə edilə bilərdi və edildi də. Onlar Ermənistan silahlı birləşmələrinə ciddi zərbə vurdular. Həm tank əleyhinə idarə olunan raket sistemlərdən, həm döyüş sursatı ilə təchiz edilmiş pilotsuz uçan aparatlardan, həm artilleriya sistemindən çox səmərəli istifadə edildi və erməni tərəfi ağır itkilərə məruz qaldı. Həmin bu silahların tətbiqi ilə onların komanda məntəqələri məhv edilib, ağır döyüş texnikaları sıradan çıxarılıb. Bu heç də reklam deyil. Bu, real vəziyyətdir. Geri qaytarılan ərazilər isə real göstəricidir. Bütün dünya da bildi ki, Azərbaycan Ordusunun səviyyəsi işğalçı Ermənistanın silahlı birləşmələrindən qat-qat üstündür".
Mənbə: Milli.Az
